
马尔巴大师教言集MARPA15ཟབ་ལམ་སྙིང་པོ་ན་རོའི་ཆོས་དྲུག་གི་སྒོམ་རིམ་གསང་བ་བདུད་རྩིའི་ཆུ་རྒྱུན་ཆོས་དྲུག་ཤིན་ཏུ་ཟབ་ཡང་བཞུགས་སོ། །
2-1-1a
༄༅། །ཟབ་ལམ་སྙིང་པོ་ན་རོའི་ཆོས་དྲུག་གི་སྒོམ་རིམ་གསང་བ་བདུད་རྩིའི་ཆུ་རྒྱུན་ཆོས་དྲུག་ཤིན་ཏུ་ཟབ་ཡང་བཞུགས་སོ། །
༄། །སྤྱིར་གྲུབ་པ་བརྒྱུད་པའི་རིམ་པ་ཅུང་ཟད་བརྗོད་པ།
༄༅། །ཟབ་ལམ་སྙིང་པོ་ན་རོའི་ཆོས་དྲུག་གི་བསྒོམ་(སྒོམ་)རིམ་གསང་བ་བདུད་རྩིའི་ཆུ་རྒྱུན་ཆོས་དྲུག་ཤིན་ཏུ་ཟབ་ཡང་བཞུགས་སོ། །
2-1-1b
༄༅། །བླ་མ་མཆོག་དང་ལྷག་པའི་ལྷ་ཉིད་དང་། །ལྷན་ཅིག་སྐྱེས་མ་མཁའ་འགྲོར་བཅས་པ་ཡི། །ཞབས་ལ་སྤྱི་བོས་གུས་པས་བཏུད་བྱ་སྟེ། །རྡོ་རྗེ་འཆང་ནས་ད་ལྟའི་བར་དག་ཏུ། །གྲུབ་ཐོབ་ཞལ་སྙན་ཐུགས་རྒྱུད་མ་ཆད་པའི། །གདམས་པ་བདུད་རྩིའི་ཆུ་རྒྱུན་བྲི་བར་བྱ། །དེ་ལ་སྤྱིར་གྲུབ་པ་བརྒྱུད་པའི་རིམ་པ་ཅུང་ཟད་ཅིག་བརྗོད་པ་ནི། སྤྱིར་གསང་བ་བླ་ན་མེད་པའི་རྒྱུད་མཐའ་དག་ནི་འོག་མིན་གྱི་གནས་གསང་བ་མཆོག་གི་དགྱེས་པ་དེར། དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེ་གཅིག་པའི་ངོ་བོ་དཔལ་རྡོ་རྗེ་འཆང་ཆེན་པོ་ཉིད་ཀྱིས་གསུངས་ཏེ། འཁོར་ཉིད་དང་མཉམ་པ་དང་། བྱང་ཆུབ་སེམས་དཔའ་ཁྲི་ཕྲག་དཔག་ཏུ་མེད་པ་
2-1-2a
དང་། རྣལ་འབྱོར་གྱི་ཚོགས་བྱེ་བ་ཕྲག་བརྒྱ་བཅུ་(བརྒྱད་ཅུ་)སྟེ། ཨ་བྷི་དྷ་ན་ལས་གསུངས་པའི་འཁོར་དེ་དག་ལ་སོགས་པ་ཌཱ་ཀི་དང་འཁོར་ལོ་ཀ་བབ་བཞི་ཆ་བཟུང་བ་ཡེ་ཤེས་ཀྱི་ས་ལ་གནས་པ་རྫུ་འཕྲུལ་ཅན་དཔག་ཏུ་མེད་པ་རྣམས་ཀྱི་སྣང་ངོ་ལ་དག་པ་ཡེ་ཤེས་པའི་སྣང་ཚུལ་བདེ་བར་གཤེགས་པ་མྱ་ངན་ལས་མི་འདའ་ཞིང་བདེ་བ་ཅན་དུ་རྟག་དུ་(ཏུ་)བཞུགས་པ་ཐུན་མོང་མ་ཡིན་པ་ཁྱད་པར་གསང་ཆེན་དུ་གདམས་པ་དང་། ཐུན་མོང་བའི་རྣམ་པར་ཐར་པ་མ་དག་པའི་འཇིག་རྟེན་གྱི་ཁམས་མི་མཇེད་གྱི་(ཀྱི་)འཇིག་རྟེན་དུ་སྤྲུལ་པའི་སྐུའི་སྣང་བ་བསྟན་པ་ཐུན་མོང་སྤྱིའི་ལོ་རྒྱུས་གཉིས་སུ་ཤེས་པར་བྱའོ། །དེ་ལ་ཆོས་སྐུ་དཔལ་རྡོ་རྗེ་འཆང་ཆེན་པོ་དེ་ཉིད་ལོངས་སྤྱོད་རྫོགས་པའི་སྐུ་བྱང་ཆུབ་ཀྱི་སེམས་
2-1-2b
རྡོ་རྗེ་ཞེས་གསང་བ་འདུས་པ་ལས་གསུངས་པའི་སྐུ་སྟེ། དེ་ཉིད་ཀྱིས་གསང་སྔགས་ཕ་རྒྱུད་མ་རྒྱུད་ཀྱི་དོན་མཐའ་དག་དཔལ་ཕྱག་ན་རྡོ་རྗེ་ལ་གསུངས། དེ་ཉིད་ལོངས་སྐུའི་བྱང་ཆུབ་སེམས་དཔའ་རྡོ་རྗེ་སྙིང་པོ་ཞེས་བྱ་བར་གྱུར་པས་གཞུང་ཚོགས་པོ་ཏི་གླེགས་བམ་དུ་བསྡུས་ནས་ནུབ་ཕྱོགས་ཨུ་རྒྱན་གན་དྷོ་ལ་དྷརྨ་ཀོ་ཥ་ཆོས་ཀྱི་མཛོད་ཅེས་བྱ་བ་ནས་སྤྲུལ་སྐུ་ཡེ་ཤེས་ཀྱི་ཌཱ་ཀི་ལ་གཏད་དེ་གནས་པ་ལས། དུས་ཕྱིས་བྱང་ཆུབ་སེམས་དཔའ་རྡོ་རྗེ་སྙིང་པོ་དེའི་སྤྲུལ་པ་དཔལ་ཤེས་རབ་བཟང་པོ་ཞེས་བྱ་བ་དེ་བྲམ་ཟེའི་རིགས་སུ་འཁྲུངས་པ་ཏིལ་གྱི་ལས་ལ་བརྩོན་པ་ཏེ་ལོ་པ་ཏིལ་གྱི་ཞབས་ཅན་ཞེས་བྱ་བ་དེས་ཡེ་ཤེས་ཀྱི་ཌཱ་ཀི་མ་ལ་གསན་ཏེ་དངོས་གྲུབ་བརྙེས་ནས་ཕྱག་ན་རྡོ་རྗེ་ཡང་ཞལ་གཟིགས། དེས་འོག་མིན་དུ་སྐུ་ལུས་ཀྱི་བཀོད་པ་བྱོན་ནས་རྡོ་རྗེ་འཆང་དང་ཡང་ཞལ་མཇལ་ཏེ་གསང་སྔགས་ཕ་རྒྱུད་མཐའ་དག་རིམ་པ་ལྔ་མ་རྒྱུད་མཐའ་དག་ཕྱག་རྒྱ་བཞིར་བསྡུས་ཏེ། བསྐྱེད་རིམ་ཡན་ལག་དྲུག་ལྡན། རྫོགས་རིམ་མཚན་ཉིད་བཞི་ལྡན། ཆོས་ཀྱི་ཚིག་གསུམ་གྱི་འཁོར་འདས་ཀྱི་ཆོས་ཐམས་ཅད་གཅིག་ཏུ་འདུས་པའི་གདམས་པ་སྐུ་གསུམ་ལམ་ཁྱེར་རྣམས་ཐུགས་སུ་ཆུད་དེ་འཛམ་བུ་གླིང་དུ་མར་
2-1-3a
བྱོན་པ་ཡིན་གསུང་ངོ་། །དེ་ལ་ཉེ་རྒྱུད་(བརྒྱུད་)དང་རིང་རྒྱུད་(བརྒྱུད་)གཉིས་ལས། ཉེ་རྒྱུད་(བརྒྱུད་)ནི་དཔལ་རྡོ་རྗེ་འཆང་ཉིད་ཀྱི་སྤྲུལ་སྐུ་ཏེ་ལོ་པ་ལ་གསུངས་པར་འདོད་ལ། རིང་རྒྱུད་(བརྒྱུད་)ལ་བཀའ་བབ་བཞི་ལས། སློབ་དཔོན་ཙཪྻ་+བ་ཙཪྻ་+ཀླུ་གྲུབ་(སྒྲུབ་)ལྭ་བ་པ། སྐལ་བ་བཟང་མོ་ལས་སྒོམ་པས་སངས་རྒྱ་བ་གཏུམ་མོའི་གདམས་པའི་བཀའ་བབས། འཕགས་པ་ཀླུ་སྒྲུབ་ལས་སྒྱུ་ལུས་འོད་གསལ། སློབ་དཔོན་ལྭ་བ་པ་ལས་རྨི་ལམ་དང་འོད་གསལ། ཌཱ་ཀི་མ་སུ་བྷ་གི་སྐལ་བ་བཟང་མོ་ལས་འཕོ་བ་དང་བར་དོའི་བཀའ་བབས་ཡང་རྒྱལ་པོ་ཨིནྡྲ་བོ་དྷི་བར་པ་ལས་གཞན་ལུས་ཤེས་རབ་ཀྱི་གདམས་པ་དང་། མ་ཏང་ཀི་ལས་གྲོང་འཇུག་གི་གདམས་པ་ཐོབ་པའོ། །དེ་ལྟ་བུའི་གདམས་པ་ཐུགས་སུ་ཆུད་ཅིང་རྒྱལ་བ་ཤཱཀྱ་ཐུབ་པའི་བསྟན་པ་ལ་མྱ་ངན་འདས་མི་འདའ་བ་དེས་རྗེ་བཙུན་ནཱ་རོ་པཎ་ཆེན་ལ་གདམས། རྗེ་ནཱ་རོ་པ་ནི་འཆི་བ་མེད་པའི་སྐུ་ཅན་ནི་དཔལ་མེ་མུར་བ་ཞེས་གྲགས་ཏེ། དེས་ཀྱང་རྡོ་རྗེའི་སྐུ་བརྙེས་པ་ཡིན་ལ། དེས་མར་པ་ཆོས་ཀྱི་བློ་གྲོས་ལ་གདམས་སོ། །དེ་ལ་གདམས་པ་དངོས་སྟོན་པ་ལ་མཚན་དོན་ནི། བཀའ་ཡང་དག་པའི་ཚད་མ་ཞེས་བྱ་སྟེ། བཀའ་ནི་དེ་བཞིན་གཤེགས་པ་རྡོ་རྗེ་འཆང་གིས་གསུངས་
2-1-3b
པ་དྲི་མ་མེད་ཅིང་རྣམ་པར་དག་པའི་གསུང་ངོ་། །ཡང་དག་པ་ནི་ཕྱིན་ཅི་མ་ལོག་པའི་དོན་སྟོན་པར་བྱེད་པ་སྟེ། ཁྱད་པར་གྱི་གཞི་དེ་གཉིས་དང་ལྡན་པས་ཚད་མ་སྟེ་མི་བསླུ་བའི་ཕྱིར་མངོན་སུམ་དུ་སྟོན་ཅིང་རྟོགས་པར་བྱ་བའི་དོན་ཁྱད་པར་གྱི་ཆོས་ཡིན་ནོ། །ཌཱ་ཀི་མའི་མན་ངག་ནི་གསང་བའི་དོན་ཏེ། རྣལ་འབྱོར་མས་གཙོ་ཆེར་གདུལ་བའི་ཕྱིར་གསུངས་པའི་གདམས་པའོ། །དེ་ལ་ཕ་རྒྱུད་མ་རྒྱུད་མཐའ་དག་གི་རྫོགས་རིམ་ཕྱོགས་གཅིག་ཏུ་བསྡུས་པ་ལས། བརྩོན་འགྲུས་ཅན་ཚེ་འདི་ལ་སངས་རྒྱ་བ་དང་། ལེ་ལོ་ཅན་བར་མ་དོར་སངས་རྒྱ་བ་དང་། ཤིན་ཏུ་ལེ་ལོ་ཅན་སྐྱེ་བ་རྒྱུད་ནས་སངས་རྒྱ་བ་ལ། བསྒོམས་ཏེ་སངས་རྒྱ་བ་གཏུམ་མོ་དང་སྒྱུ་ལུས། མ་བསྒོམས་ཀྱང་སངས་རྒྱ་བ་འཕོ་བ་དང་ལས་རྒྱ། གཉིད་ལོག་པས་སངས་རྒྱ་བ་རྨི་ལམ་དང་འོད་གསལ། རང་བཞིན་ཤེས་པས་སངས་རྒྱ་བ་བར་དོ་དང་ཕྱག་རྒྱ་ཆེན་པོ། དེ་དག་ལ་རིམ་གྱིས་པར་བསླབ་པ་དང་། [ཕ་རྒྱུད་པའི་ལུགས་ལྟར་ན།] ཅིག་ཅར་བར་བསླབ་པ་དང་གཉིས་སོ། །ལམ་ཁྲིགས་ཆགས་སུ་བསྟན་པ་དང་། ལམ་ཁ་འཐོར་བར་བསྟན་པ་དང་། ལམ་གྱི་བོགས་འདོན་དང་། [རྒྱས་པར་ཕྱེ། ཆོས་སྤྱོད་ལ།] གེགས་སེལ་དུ་བསྟན་པའོ། །ཡང་ལྷན་ཅིག་སྐྱེས་པའི་རྣལ་འབྱོར་ལ་ཚེ་འདིར་སངས་[བསྲེ་འཕོ་གཉིས།] རྒྱ་བར་བྱེད་པ་ཆོས་
2-1-4a
སྐུ་ཐུག་ཕྲད་ཀྱི་བར་དོ། སྲིད་པ་བར་དོར་སངས་རྒྱ་བར་བྱེད་པ་དག་སྒྱུ་ལུས་ཀྱི་ངོ་སྤྲོད། སྐྱེ་བ་ཕྱི་མར་སངས་རྒྱ་བ་མ་དག་པ་སྒྱུ་ལུས་ཀྱི་མཚམས་སྦྱོར། དེ་དག་ཏུ་འདུས་པར་བཞེད་དོ། །ཡང་ལམ་བསྲེ་བ་དང་འཕོ་བ་གཉིས་སུ་ཡང་བཞེད་དོ། །དེ་ལ་གཞིའི་བསྲེ་བ་དང་། ལམ་གྱི་བསྲེ་བ་དང་། འབྲས་བུའི་བསྲེ་བར་ཡང་གསུང་། འཕོ་བ་ལ་སྤྲོས་བཅས་གཟུགས་སྐུ་དང་། སྤྲོས་མེད་ཆོས་སྐུ་གཉིས། ཡིད་འོང་མཁའ་འགྲོའི་[འདུས་པར།] འཕོ་བའོ། །སྤྲོས་བཅས་ནི་ལོངས་སྤྱོད་རྫོགས་པ་སྐུའི་འཕོ་བ་དང་། སྤྲུལ་པ་སྐུའི་འཕོ་བ་དང་། མཚན་མ་མེད་པ་ཆོས་ཀྱི་སྐུ་ལ་རབ་ཏུ་འཕོ་བ་རྣམས་སུ་གསུངས་སོ། །ཡང་ན་སྒྱུ་ལུས་ལམ་གྱི་གཞི་མ། གཏུམ་མོ་ལམ་གྱི་སྲོག་ཤིང་། འཕོ་བ་ལམ་གྱི་བློ་ཆོད། བར་དོ་ལམ་གྱི་སུན་མ། རྨི་ལམ་ལམ་གྱི་དྲོ་ཚད། འོད་གསལ་ལམ་གྱི་སྙིང་པོ། གྲོང་འཇུག་ལམ་གྱི་འཐུད་མ། ལས་རྒྱ་ལམ་གྱི་བོགས་འདོན། ཟུང་འཇུག་ལམ་གྱི་མཐར་ཐུག་ཏུ་བཞེད་དོ། །དེ་ཡང་ན་རེ་རེ་ལ་ཡང་སྦྱོར་བ། སྔོན་དུ་འགྲོ་བ་ཡན་ལག་གི་ཆོས། དངོས་པོའི་གནས་ལུགས་དམིགས་པའི་ཡུལ་དུ་བཞག་པ། [ལས་རྒྱ་ལམ་གྱི་བོགས་འདོན།] དངོས་གཞི་གནད་ཀྱི་གདམས་པ། རྗེས་སྣང་བ་ལམ་ཁྱེར་ལ་བསླབ་པའོ། །[དེར་ཡང་འདས།] ཡང་རྒྱུད་
2-1-4b
མཐའ་དག་གི་དོན་ཡིད་བཞིན་ནོར་བུ་རྣམ་པ་གསུམ་དུ་འདུས་པར་གསུངས་པ་ནི། གསང་བ་སྦས་པའོ། །དེ་དག་ཐམས་ཅད་ནི་ཐབས་ལམ་གྱི་གནད་སྤྱིའི་རྣམ་པར་བཞག་པའོ། །
༄། །ལམ་ལ་འཇུག་པར་བྱེད་པ་རྟེན་གྱི་གང་ཟག་བསྟན་པ།
དེ་ལ་ལམ་ལ་འཇུག་པར་བྱེད་པ་རྟེན་གྱི་གང་ཟག་བསྟན་པ་ནི། [གནས་ལུགས། ཐུན་མོང་། དམ་ཚིག་སྟེ།] གང་ཟག་བློའི་ཁྱད་པར་གྱིས་ཞེས་པ་སྒྲུབ་པ་པོ་སྟོན་པ་ནི། ཕ་རྒྱུད་ལས་གསུངས་པ་དང་དོན་མཐུན་ཏེ། བློའི་རྣམ་པ་དཔག་མེད་ལས། །གང་ཟག་རྣམ་པ་ལྔར་འདོད་དོ། །ཞེས་གསུངས་པ་དང་། དབང་པོ་ཐ་མ་དངོས་པོ་ལ་ཞེན་པ་ཤས་ཆེ་བ་དང་། དབང་པོ་འབྲིང་པོ་དངོས་པོ་ལ་ཞེན་པ་ཆ་འབྲིང་བ་དང་། དབང་པོ་རབ་དངོས་པོ་དང་མཚན་མར་ངོ་བོ་ཉིད་ཀྱིས་མ་ཞེན་པ་དང་། དབང་པོ་རབ་གསེར་འགྱུར་གྱི་རྩིས་ཟིན་པ་ལྟ་བུ་དང་བཞིའོ། །དམན་པ་འབྲིང་དང་མཆོག་ཅེས་རྒྱུད་མཐའ་དག་ལས་གྲགས་པ་དང་། ཨུཏྤལ་ལྟ་བུ་དང་། པད་དཀར་ལྟ་བུ་དང་། ཙན་ལྡན་(དན་)ལྟ་བུ་དེ་དག་ནི་དམན་པ་དང་འབྲིང་རྣམས་སོ། །མཆོག་ནི་རིན་པོ་ཆེ་ལྟ་བུ་སྟེ་འདིར་རིམ་གྱིས་པ་བློ་དམན་པ་དང་། ཅིག་ཅར་བ་མཆོག་ཏུ་གྱུར་པའོ། །ཉམས་སུ་མྱོང་བས་ན། དེ་ལ་ཐོད་རྒལ་བ་ཞིག་ཀྱང་འོང་སྟེ་འདིར་ངོས་མ་གཟུང་བའོ། །དེ་ལ་བློ་དམན་པ་སྐས་ཀྱི་གདང་བུ་ལྟར་མས་འཛེག་པ་རྣམས་ལ་ནི་
2-1-5a
ལམ་སྐྱབས་སུ་འགྲོ་བ་ནས་བརྩམས་ཏེ་ལམ་རིམ་པ་ནས་རིམ་པར་བསླབས་པས། ཉན་ཐོས་ཀྱི་ལམ་དང་། རང་རྒྱལ་གྱི་དང་། སེམས་ཙམ་པ་དང་། དབུ་མའི་བར་དུ་བསླབ་ནས་གདོད་རྒྱུད་སྡེ་རིམ་གྱིས་ཞུགས་པ་ལ་གསང་བ་བླ་ན་མེད་པར་དབང་ཐོབ་པས་གཟོད་མཐར་ཐུག་གི་ལམ་ལ་བསླབ་བོ། །དེ་ལྟར་ཡང་དཔལ་ཀྱེ་རྡོ་རྗེའི་བརྟག་པ་ཕྱི་མའི་ལེའུ་བརྒྱད་པ་ལས། རྒྱུད་ཀུན་གཞུང་ནི་རབ་ཤེས་ནས། །དེ་རྗེས་ཀྱེའི་རྡོ་རྗེ་བརྩམས། །ཞེས་པ་ལ་སོགས་པའི་དོན་ཏོ། །དེ་ལྟར་མ་བསླབས་པར་རིམ་གྱིས་པ་ལ་ཅིག་ཅར་བ་བསྟན་ན་འཇིགས་ཤིང་སྐྲག་སྟེ་དཔེར་ན་སྨན་གྱི་རྒྱལ་པོ་ག་པུར་དེ་ཚད་པ་ཅན་ལ་སྨན་སྟེ་(ཏེ་)གྲང་བ་ཅན་ལ་དུག་ཏུ་འགྱུར་བའོ། །འགྲོ་ལྡོག་ཅན་ཏེ། གཅིག་ལ་ཕན་ཀྱང་ཅིག་ལ་དུག་ཏུ་འགྱུར་བའོ། །ཅིག་ཆར་བ་ནི་བློ་མཆོག་ཏུ་བསྒྱུར་བ་སྟེ་ལམ་ཆིག་ཆོད་དུ་འདོད་པ་དེ། རིམ་གྱིས་པ་ལ་བསྟན་ན་ཆོས་ལོག་ཏུ་འགྱུར་ཏེ་འགལ་བ་ཅན་དུ་འགྱུར། དེས་ན་བློའི་ཁྱད་པར་ཤིན་ཏུ་ཆེ་བས་རྟེན་གྱི་གང་ཟག་སྐྱེ་བ་སྔ་མ་ཕན་ཆད་དུ་སྦྱངས་པའི་འཕྲོ་ཅན་རིགས་སད་པ་རྣམས་ལ་ནི་གཉུག་མའི་ཡེ་ཤེས་ལམ་ཅིག་ཅར་དུ་འཇུག་པ་བསྟན་པར་བྱའོ། །ལས་དང་པོ་པའི་རིགས་ཅན་རྣམས་ལ་ནི། བརྩོན་འགྲུས་ཅན་སྐྱེ་བ་འདི་རང་ལ་སངས་རྒྱ་བར་འདོད་པས་ལམ་
2-1-5b
རིམ་གྱིས་བསླབས་ལ་ཏིང་ངེ་འཛིན་མ་སྐྱེས་པ་བསྐྱེད་སྐྱེས་པ་བརྟན་པར་བྱ་ཞེས་སོ། །དེས་ནི་གང་ཟག་ངོས་བཟུང་བ་དང་། ཆོས་ཇི་ལྟ་བུ་བསྟན་པའི་ཚུལ་ངོས་བཟུང་བའོ། །དེ་ལ་ལམ་རིམས་ཀྱིས་བགྲོད་པར་བྱ་བའི་ཕྱིར། ཐེག་པ་ཐུན་མོང་བ་དང་སྒོ་བསྟུན་ནས། དང་པོ་ཉོན་མོངས་འདུལ་བ་ནི། ཞེས་པས་འདིར་ཆོས་ཀྱི་ལམ་གང་དང་གང་གིས་ཉོན་མོངས་པ་འདུལ་བར་བྱེད་པ་ཡིན་ལ། དེ་ལ་ཉོན་མོངས་པ་གང་དང་གང་ཤས་ཆེ་བ་དེ་དག་གི་གཉེན་པོར་ཁམས་ཀྱི་དབྱེ་བ་ཕྱེ་སྟེ། ཕ་རོལ་ཏུ་ཕྱིན་པ་ལྟར་ན་འདོད་ཆགས་ཀྱི་གཉེན་པོར་མི་སྡུག་པ་དང་། ཞེ་སྡང་གི་གཉེན་པོར་བྱམས་པ་དང་། གཏི་མུག་གི་གཉེན་པོར་རྟེན་འབྲེལ་གང་འོས་པ་བསྒོམ་(སྒོམ་)པར་བྱེད་དོ། །དེ་ལས་ཕུང་པོ་ཞིག་སྒྲོལ་བསྒོམ་པ་ཡང་འདུ་ཤེས་བཅུ་གཉིས་ལ་ཉེ་བར་རྟོགས་པར་བྱེད་པ་ཡིན་ལ། འདིར་བླ་མའི་བཞེད་པས་གཞི་སྤོང་བའི་ལམ་སྤང་བྱ་སྤོང་བྱེད་དུ་འདོད་པ་མ་ཡིན་ཞིང་། རྣལ་འབྱོར་གྱི་རྒྱུད་ཡོ་ག་མན་ཆད་བཞིན་དུ་གནས་འགྱུར་དུ་ཡང་མ་ཡིན་ཏེ། འདིར་རང་བཞིན་ཡོངས་སུ་ཤེས་པའི་ལམ་པ་ཞེས་བྱ་བ་ཡིན་ཏེ། ཉོན་མོངས་པ་དེ་ཉིད་ཀྱི་རང་བཞིན་ཤེས་པས་ལམ་དུ་འགྲོ་བར་འཕགས་པ་ཡབ་སྲས་བཞེད་པ་དེ་ཉིད་ལྟར་ཤེས་པར་བྱའོ། །
༄། །ཁམས་འབྱུང་བ་བཞི་ཡི་རབ་ཏུ་དབྱེ་བ་བསྟན་པ།
འདིར་ནི་ཉོན་མོངས་པ་གསུམ་
2-1-6a
གང་ཤས་ཆེ་བ་ཡང་། ཁམས་འབྱུང་བ་བཞིས་བསྡུས་པས་དེ་དག་གི་རབ་ཏུ་དབྱེ་བ་བསྟན་པ་ནི། འབྱུང་བ་བཞི་ལས་ས་ཤས་ཆེ་བའི་མི་དེ་ནི་ལུས་ཤིན་ཏུ་ལྕི། སྐུལ་བ་ཤིན་ཏུ་དཀའ། ལུས་སྟོབས་ཅུང་ཟད་ཆེ། ཁ་དོག་སེར། གདོན་དུ་རྒྱལ་པོའི་གནོད། རྨི་ལམ་དུ་ཡང་རིའི་འོག་ཏུ་ཚུད་པ་དང་། གཡང་ཆེན་པོ་ལ་ལྷུང་བ་དང་། ཁང་པ་སྡེབ་(རྡིབ་)པ་ལྟ་བུ་དང་། འོག་ཁང་མུན་ནག་མང་པོ་འགྲིམ་པ་ལྟ་བུ་ལ་སོགས་པ་མང་དུ་འབྱུང་། ཟས་ཕལ་ཆེར་ལ་དགའ་ཞིང་ཤིན་ཏུ་སྐྱུར་དད་ཆེ། དད་པ་ཡང་ཅུང་ཟད་ཆེ་བར་འོང་། རྟག་ཐུབ་བློ་སྣ་འགྱུར་བ་དཀའ་བ། ལམ་ལ་ཞུགས་ནས་ཕྱིར་མི་ལྡོག་སྟེ། ཤེས་རབ་ཆུང་བ་ཤས་ཆེའོ། །འབྱུང་བ་ཆུ་ཤས་ཆེ་བ་རྣམས་ནི་ལུས་རྒྱུ་བ་སླ། ཤེད་ཉམས་ཆུང་ལུས་སྣུམ་ལ་ཁ་དོག་དཀར་ཏེ། གདོན་དུ་མགོན་པོའི་གནོད། རྨི་ལམ་དུ་ཡང་ཟམ་པ་ཆེན་པོ་ལ་འགྲོ་བ་དང་། ཆུ་ཆེན་པོ་བརྒལ་བ་དང་། ཆུས་ཁྱེར་བ་དང་ལྕག་ལྕིག་མང་པོའི་གསེབ་ན་ཕར་འགྲོ་བ་དང་། ཆུ་མིག་མང་པོ་རྨི་བ་ལ་སོགས་པ་འབྱུང་། སྐོམ་དད་ཆུང་དཀར་ལ་དགའ། དད་པ་ཤིན་ཏུ་ཆེ། བློ་སྣ་འགྱུར་བ་ཤིན་ཏུ་སླ། སྙིང་རྗེ་ཆེ། ལམ་ལ་ཞུགས་ནས་ཕྱིར་ལྡོག་མི་ལྡོག་ཐེ་ཚོམ་ཟ། ཤེས་རབ་འབྲིང་། དམིགས་པ་རྣོ་བ་ཞིག་འབྱུང་བ་ཤས་ཆེའོ། །
2-1-6b
འབྱུང་བ་མེ་ཤས་ཆེ་བའི་མི་དེ་ནི། ལུས་ཀྱི་སྤྱོད་ལམ་དྲག་ཤུལ་ཆེ། ལུས་དྲོད་ཆེ། བུད་མེད་ལ་དགའ། ཁ་དོག་དམར་སྐྱ་སེར་བ། གདོན་དུ་མོ་འདྲེའི་གནོད། རྫུན་ལ་དགའ། རྨི་ལམ་དུ་ཡང་མེ་འབར་བ་མཐོང་བ་དང་། ལུང་པ་ཐམས་ཅད་ཁ་དོག་དམར་པོར་མཐོང་བ་དང་། མེའི་སྣང་བ་འབའ་ཞིག་ཤས་ཆེའོ། །ཟས་ལ་ངེས་པ་མེད་དོ་སྐོམ་དད་ཆེ། བློ་གཏད་ཐུབ། ཤ་དམར་པོ་ཟ་བ་ལ་དགའ་བརྩོན་འགྲུས་ཆེ་སྟེ་དད་པ་འབྲིང་། སྙིང་རྗེ་ཆུང་། ལམ་དུ་ཞུགས་ནས་བར་སྐབས་སུ་འགྱུར་ལྡོག་མི་འོང་། ཤེས་རབ་ཆེ་བར་འོང་ངོ་། །འབྱུང་བ་རླུང་ཤས་ཆེ་བའི་མི་དེ་ནི། ལུས་ཤིན་ཏུ་ཡང་། ལུས་ངག་ཡིད་གསུམ་གྱི་འདུ་བྱེད་ཤིན་ཏུ་མང་། ལས་གང་ཡང་མཐར་མི་ཕྱིན་སྨྲ་ལ་དགའ། ལུས་ཁ་དོག་སྔོ། གདོན་དུ་ཕོ་འདྲེ་གཉིས་ཀའི་གནོད། རྨི་ལམ་དུ་རླུང་ཚུབ་ཆེན་པོ་རྨི། རླུང་གིས་ལུས་འདོགས་པ་རྨི། རྐང་པ་མགྱོགས་པར་རྨི། བརྩོན་འགྲུས་ཅུང་ཟད་ཆེ་བྲེལ་ཞིང་བློ་སྣ་མང་། བློ་གཏད་པ་དེ་སྤྱིར་མི་བསླུ། བསླུས་ན་ཕུང་བར་བྱེད། ཟས་ལ་ངེས་པ་མེད། དད་པ་ཆེ། ཕན་སེམས་རེས་བྱེད་རེས་མི་བྱེད། ལམ་ལ་ཞུགས་ན་བར་སྐབས་སུ་འགྱུར་ལྡོག་འོང་། དེས་མ་ཚུགས་ན་ལམ་སྙོགས། ཤེས་རབ་འབྲིང་ཙམ་དུ་བསྡུ། བླ་མས་གདམས་པ་བསྟན་པ་ལ་ཡིད་ཆེས་
2-1-7a
པ་ཅིག་འབྱུང་ངོ་། །འབྱུང་བ་ས་ཤས་ཆེ་བ་ནད་བད་ཀན་ཤས་ཆེ། རོ་སྟོད་ན་བ་མང་དུ་འབྱུང་ལ་ཉོན་མོངས་པ་ཞེ་སྡང་ཤས་ཆེ་བར་འགྱུར་བས་དེ་ལ་བསྐྱེད་རིམ་སྒྱུ་ལུས་དང་ངག་གི་སྙིང་པོ་གཙོར་བྱའོ། །འབྱུང་བ་ཆུ་ཤས་ཆེ་བ་ལ་ནད་མཁྲིས་པ་ཤས་ཆེ་བས། མཁྲིས་མང་སྟེ་མགོ་ན་བ་མང་དུ་འབྱུང་བ་ཉོན་མོངས་པ་གཏི་མུག་ཤས་ཆེ་བར་འགྱུར་བས་འོད་གསལ་བ་དང་རྟེན་འབྲེལ་ལ་སོགས་གཙོ་བོར་བྱའོ། །འབྱུང་བ་མེ་ཤས་ཆེ་བ་ལ་ནད་ཁྲག་ཤས་ཆེ་སྟེ་ལུས་རྐེད་པ་ན་བ་མང་དུ་འབྱུང་ཞིང་ཉོན་མོངས་པ་འདོད་ཆགས་ཆེ་བ་ལ་གཏུམ་མོ་དང་ལས་རྒྱ་དང་ཕྲ་མོའི་རྣལ་འབྱོར་ལ་གཙོ་བོར་བྱའོ། །འབྱུང་བ་རླུང་ཤས་ཆེ་བ་ལ་ནད་རླུང་ཉིད་ཤས་ཆེ་སྟེ། ཉོན་མོངས་པ་ང་རྒྱལ་དང་ཕྲག་དོག་ཤས་ཆེ། ལུས་ཀྱི་སྨད་དང་སྟོད་སྙིང་རླུང་ལ་སོགས་པ་འཇུག་ཉེན་ཡོད་པས་འཕོ་བ་དང་གྲོང་འཇུག་ཐིག་ལེའི་རྣལ་འབྱོར་ལ་འབད་པར་བྱའོ། །འདི་དག་ཀྱང་མདོ་ཙམ་དུ་བསྟན་ཏེ། སྤྱིར་ཉོན་མོངས་པ་དང་ལས་དང་བག་ཆགས་མི་འདྲ་བ་དཔག་ཏུ་མེད་པ་ཡོད་པས་རླུང་བྲས་ཅན་གྱིས་རླུང་སེར་བུ་སྤང་། རྫད་པ་ཅན་གྱིས་གྲིབ་མ་སྦྱང་། བད་ཀན་ཅན་གྱིས་ཉི་མ་སྤང་། མཁྲིས་པ་ཅན་གྱིས་མེ་སྤང་། གདོན་དང་ནད་རིགས་ཁམས་འདུས་གང་ཤས་ཆེ་བ་སོ་སོའི་གཉེན་པོ་དང་
2-1-7b
སྦྱར་ལ་བསྟན་པར་བྱའི། ཕྱོགས་གཅིག་ཁོ་ནར་འཆད་པ་ནི་མ་ཡིན་ནོ། །འདིར་སློབ་དཔོན་ཙཪྻ་བ་ནི་ཉོན་མོངས་པ་གང་ཤས་ཆེ་བ་སོ་སོའི་གཉེན་པོ་དང་སྦྱར་བ་དང་། ཁམས་ལྔའམ་དྲུག་གི་དབྱེ་བས་ཕྱེ་བ་དང་། འབྱུང་བ་དེ་དག་ལམ་དུ་སློང་བ་ལ་འབད་པས་རྩོད་པར་སའི་ཏིང་ངེ་འཛིན་དང་། ཟད་པར་ཆུ་དང་མེ་དང་། ཟད་པར་རླུང་དང་ཟད་པར་ནམ་མཁའི་ཏིང་ངེ་འཛིན་མངོན་དུ་བྱ་བ་གྱུར་པ་དང་། འབྱུང་བ་བཞི་ཟིལ་གྱིས་གནོན་པ་སྟེ་འབྱུང་བའི་གནོད་པས་མི་ཚུགས་པ་འབྱུང་བ་དང་། སྣང་བ་ཟིལ་གྱིས་གནོན་པ་སྟེ་མཐོང་ན་མི་མཐུན་པ་མེད་པ་དང་། རྣམ་རྟོག་ཟིལ་གྱིས་གནོན་པ་སྟེ་གཉིས་སུ་མེད་པའི་ཡེ་ཤེས་ཀྱི་སྣང་བ་འཆར་བ་འབྱུང་བ་ཡིན་ནོ། །སློབ་དཔོན་ལུ་ཡི་པའི་བཞེད་པས་རྟེན་གྱི་གང་ཟག་དབང་པོ་རབ་འབྲིང་ཡང་རབ་གསུམ་གྱིས་གོ་བ་ཙམ་གྱིས་བདག་ཉིད་རྡོ་རྗེ་འཆང་དུ་སྒྲུབ་པར་བྱེད་པ་སྟེ། ཐབས་ལ་མཁས་ཤིང་ཐབས་མང་བ་ལམ་དུ་བྱ་བ་ནི། ཕ་རོལ་ཏུ་ཕྱིན་པ་བས་སྤང་བྱར་བྱེད་ཀྱང་གསང་སྔགས་པས་ཁམས་རང་བཞིན་གྱི་རྣམ་པར་དག་པར་འདོད་པས། ཕུང་པོ་ལྔ་རིགས་ལྔ། དེ་གཅིག་ཏུ་གྱུར་པ་རྡོ་རྗེ་འཆང་། ཁམས་འབྱུང་བ་ལྔ་ཡུམ་ལྔ། སྐྱེ་མཆེད་ཐམས་ཅད་བྱང་ཆུབ་སེམས་དཔའ། ཡུལ་དྲུག་རྡོ་རྗེ་སེམས་དཔའ་ལ་སོགས་པ་དེ་དག་
2-1-8a
ཐམས་ཅད་འཕགས་པ་ཡབ་སྲས་དང་བཞེད་ལུགས་གཅིག་ལ། རྩ་དང་རླུང་དང་ཐིག་ལེ་རྣམ་པར་དག་པ་མ་རྒྱུད་དུ་གསུངས་ཏེ། ཁམས་དབང་པོ་རྣམ་པར་དག་པ་ནི་སོ་དང་སེན་མོ་ལ་ཁཎྜ་ཀ་པཱ་ལའོ། །སྐྲ་དང་བ་སྤུ་དག་ལ་ནི་ཀེང་རུས་སོ། །ཤ་ལ་མཆེ་བ་རྣམ་པར་གཙིགས་པའོ་ཞེས་བྱ་བ་ནས་མཆི་མ་ལ་ནི་གར་གྱི་དབང་ཕྱུག །མཆིལ་མ་ལ་ནི་རྣམ་པར་སྣང་མཛད། སྣབས་ལ་རྡོ་རྗེ་སེམས་དཔའ་སྟེ་ཞེས་པའི་བར་དུའོ། །དེ་དག་གི་འབྲས་བུ་ལམ་དུ་བྱེད་པ་འདི་ཉིད་ཀྱི་དུས་རྟག་ཏུ་སངས་རྒྱས་ཀྱི་ང་རྒྱལ་དང་མ་བྲལ་བར་སྤྱད་པས་དེའི་དམ་ཚིག་གསུམ་ལས་མི་འདའ་བར་འགྱུར་བ་ཡིན་ནོ། །རྗེ་བཙུན་ཉིད་ཀྱིས་ནི་དབང་པོ་རབ་འབྲིང་གི་དབྱེ་བ་ཤེས་ནས་ཐེག་པ་ཐུན་མོང་བ་དང་མཐུན་པར་སྟོན་པ་སྟེ་རྣལ་འབྱོར་པ་ཀུ་ས་ལི་པའི་ནང་གི་ཚོགས་སོག །རང་ལུས་འབྱུང་བས་བསྡུས་པ་འདི། །ཐ་མལ་ལུས་ལ་མ་ཞེན་པར། །བླ་མ་རྡོ་རྗེ་འཛིན་པ་ནས། །སངས་རྒྱས་བྱང་ཆུབ་སེམས་དཔའ་དང་། །སྣང་སྲིད་ལུས་ཅན་ཐམས་ཅད་དང་། །བགེགས་ཚོགས་མ་ལུས་ཐམས་ཅད་ལ། །སོ་སོའི་སྐལ་བར་མ་འདྲེས་པར། །ཇི་ལྟར་མཁོ་བ་དབུལ་བར་མཛོད། །ཅེས་གསུངས་པས་རང་ལུས་ཞེན་པ་མེད་པར་གང་ལ་གང་འོས་སུ་སྦྱིན་པ་བཏང་
2-1-8b
ཞིང་མཆོད་པ་ཕུལ་ནས། བསྐལ་པ་གྲངས་མེད་པ་བསམ་གྱིས་མི་ཁྱབ་པ་ཡང་སྐད་ཅིག་དེ་ཉིད་ཀྱིས་མཆོད་དེ་ནམ་མཁའི་མཐའ་དང་མཉམ་ཆོས་ཀྱི་དབྱིངས་དང་མཉམ་པར་གྱུར་པ་དང་། བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་བློ་སྦྱངས་པས་འགྲོ་བ་གཞན་དོན་གཙོ་བོར་བྱས་པར་འགྱུར་བ་དང་། ཐབས་ལ་མཁས་པར་འགྱུར་བ་དང་། ལམ་མྱུར་དུ་བགྲོད་པ་དང་། ནམ་འཆི་བའི་ཚེ་གནད་གཅོད་པའི་དུ་ཁ་མི་འབྱུང་བ་དང་། དམིགས་པ་གར་གཏད་དུ་སྒྱུར་སླ་བ་དང་། ཆོས་ཉིད་མྱུར་དུ་རྟོགས་པར་འགྱུར་བ་དང་། འབྲས་བུ་ཟད་པ་དང་ཟིལ་གནོན་གྱི་ཏིང་ངེ་འཛིན་གྱིས་འགྲོ་བའི་དོན་ཐོགས་པ་མེད་པར་འབྱུང་བའི་དགོས་པ་ཡོད་པའོ། །གསང་བ་བླ་ན་མེད་པའི་ཐེག་པར་སྨིན་པའི་ལམ་དུ་དབང་བཞི་རྫོགས་པར་ཐོབ་ནས། གྲོལ་ལམ་དུ་ལམ་རིམ་པ་གཉིས་ལ་བརྟེན་ནས་བསྒྲུབ་པར་བྱ་སྟེ། བླ་མས་བསྟན་པའི་ལམ་གྱིས་ནི། །སློབ་མ་ཡོངས་སུ་སྨིན་པར་བྱ། །ཞེས་གསུངས་པས་དབང་ཡོངས་སུ་རྫོགས་པར་ཐོབ་ནས་ལམ་བསྐྱེད་རྫོགས་ལ་བསླབ་པ་ལ། རྡོ་རྗེ་འཆང་གིས་ཆོས་བསྟན་པ། །རིམ་པ་གཉིས་ལ་ཡང་དག་རྟེན། །བསྐྱེད་པ་ཡི་ནི་རིམ་པ་དང་། །དེ་བཞིན་རྫོགས་པའི་རིམ་པའོ། །རིམ་གཉིས་མཉམ་པར་གནས་ནས་ནི། །རྡོ་རྗེ་འཆང་
2-1-9a
གིས་ཆོས་འཆད་དོ། །ཞེས་གསུངས་པ་དང་། དང་པོ་ལུས་ཀྱི་ཞེན་པ་མཐའ་དག་བཟློག་པར་བྱ་བའི་ཕྱིར། བསྐྱེད་རིམ་གཞུང་ལས་ཤེས་པར་བྱ། །ཞེས་གསུངས་པས་དེ་ལ་ལྷ་དཔའ་བོ་གཅིག་པའམ། དཔའ་མོ་གཅིག་པའམ་ཡབ་ཡུམ་ཞལ་སྦྱར་རྣམས་ལ་དང་པོར་རྣམ་པ་ལ་བསླབ་པ་ན། དབང་པོ་རྣོན་པོར་གྱུར་པས་ད་ལའི་འཁོར་ལོ་རྒྱས་པར་བསྒོམ་པའི་བར་དུ་བསླབ་སྟེ། དེ་ལ་བསྐྱེད་པའི་རིམ་པ་ནི་ཆོ་ག་གསུམ་གྱིས་བསྐྱེད་པ་དང་། རྡོ་རྗེ་རྣམ་བཞིས་བསྐྱེད་པ་དང་། མངོན་པར་བྱང་ཆུབ་པ་ལྔས་བསྐྱེད་པའོ། །དེ་ལྟར་རིམ་པ་མང་ཡང་གང་རུང་བ་གཅིག་ནས་བསླབ་པར་བྱའོ། །དེ་ལ་སྦྱང་གཞི་བསྐྱེད་པའི་རིམ་པ་ནི། ལུས་མངོན་པར་བྱང་ཆུབ་པ་ལྔ་ལས་གྲུབ་ཅིང་བསྐྱེད་པའི་ཕྱིར་དང་། དུམ་བུ་དང་ཆ་ཤས་ལས་བསྐྱེད་པ་དང་། ཆེན་པོ་ལྔ་ལས་གྲུབ་པའི་ཕྱིར་ལུས་གདོད་མ་ནས་ལྷའི་རྣམ་པར་གནས་ཏེ། བཞིན་ལག་ཁ་དོག་ལྷའི་རྣམ་པར་གནས་པ་ལས། ངོ་བོ་ལྷར་གཏན་ལ་དབབ་པ་དང་། རྣམ་པ་ལོགས་པར་གནས་པའོ། །དེ་ཡང་ལུས་སྤྲུལ་བའི་དགེ་སློང་གི་ཚུལ་དུ་བྱུང་བ་སྟེ། ཟླ་བ་བཅུ་གནས་དང་ཉེ་བའི་གནས་ལ་སོགས་པ་རྩ་རྣམས་རིམས་ཀྱིས་ཆགས་པས་ཀྱང་ལྷའི་ངོ་བོས་ས་རྣམས་བགྲོད་པའོ། །
2-1-9b
དེ་ཡང་འཆི་བ་སྟོང་པ་འོད་གསལ་དུ་འཇུག་པ་ཆོས་སྐུ་བར་མ་དོའི་སྲིད་པ་ལོངས་སྤྱོད་རྫོགས་པའི་སྐུ། སྲིད་པའི་སྐྱེ་བ་སྤྲུལ་པའི་སྐུ་སྟེ། ལུས་སྐུ་གསུམ་མཛད་པ་དང་བཅས་པའི་ངང་དུ་རྫོགས་པར་འགྱུར་རོ། །དེ་ལ་སྦྱོང་བྱེད་ཐབས་བསྐྱེད་པའི་རིམ་པ་བསྒོམ་པ་ལ་བསྐྱེད་ཚུལ་དང་། བསླབ་ཚུལ་ལམ། བསྐྱེད་ཚུལ་བཞི་གང་ཡང་རུང་བ་ལས་བསྐྱེད་པ་དང་། བསླབ་ཚུལ་ནི་ཐུན་མཚམས་ལ་བསླབ་པ་དང་། ལྷའི་རྣམ་པ་ལ་བསླབ་པ་དང་། གོ་རིམས་ལ་བསླབ་པ་དང་། ཞལ་ཕྱག་ལ་བསླབ་པའོ། །དེ་ཡང་རང་ཉིད་ཏིང་ངེ་འཛིན་བརྟན་པས་སྣོད་བཅུད་ལྷ་དང་ལྷ་མོར་འཆར་བ་དང་། རང་ལུས་ལྷའི་དཀྱིལ་འཁོར་འཆར་བའོ། །དེ་ལ་ལྷའི་རྣམ་པ་གསལ་བ་ངོ་བོ་སྟོང་པ། མཚན་ཉིད་གཉིས་མེད་ཟུང་འཇུག་ཉམས་བདེ་སྟོང་དུ་བསྒོམ་མོ། །མཐར་ཕྱིན་པའི་ཚད་ནི། རྣམ་པ་གསལ་བ་ལ་རྐྱེན་གཞན་གྱིས་མི་གནོད་པ་དང་འདོད་པས་རབ་ཏུ་ཕྱེ་སྟེ་གསལ་བ། རང་གིས་ངང་གིས་འཇུག་པར་འགྱུར་བའོ། །དེ་ལྟར་བསྐྱེད་པའི་རིམ་པ་ལ་བསླབས་ནས་ལུས་རྣམ་པར་དབེན་པ་ལ་འཇུག་པར་འགྱུར་བ་ནི། བསྐྱེད་རྫོགས་གཉིས་ཀའི་ཐུན་མོང་གི་ཆོས་ཡིན་ཏེ། དེ་ཡང་ལུས་འདི་ཉིད་ཀྱི་རང་བཞིན་སྟོང་པར་ཤེས་པས་སྣང་ལ་རང་བཞིན་མེད་
2-1-10a
པར་བསྒོམ་པའོ། །སྐད་ཅིག་དྲན་རྫོགས་ནི་བསྐྱེད་པའི་རིམ་པ་ལྷའི་རྣམ་པ་དང་། རྫོགས་རིམ་གཉིས་ཀ་ཚང་བའོ། །ངག་དབེན་པ་དང་རླུང་བསྒོམ་པ། བླ་མའི་ཞལ་ལས་ཤེས་པར་བྱ། ཞེས་པ་ནི། དཔལ་གསང་བ་འདུས་པའི་ཕ་རྒྱུད་ཀྱི་དགོངས་པའི་ལམ་ཡིན་ཏེ། ངག་རྣམ་པར་དབེན་པ་ནི། རླུང་གི་དེ་ཁོ་ན་ཉིད་འཇུག་གནས་ལྡང་གསུམ་དང་། སྔགས་ཀྱི་དེ་ཁོ་ན་ཉིད་ཡི་གེ་འབྲུ་གསུམ་དུ་སྦྱར་ཏེ། རླུང་ནང་དུ་འཇུག་པ་ཨོཾ། གནས་པ་ཨཱ། ལྷང་བ་ཧཱུྃ་དུ་བལྟ་སྟེ་སྐུ་གསུང་ཐུགས་རྡོ་རྗེ་གསུམ་དུ་སྦྱར་བ་ནི། རླུང་བཅུ་པ་ཆ་གསུམ་དུ་སྦྱར་བས་རྡོ་རྗེའི་བཟླས་པ་ངག་དབེན་པ་རླུང་ལས་རྣམ་པར་རྒྱལ་བ་སྟེ། སྒྲའི་དེ་ཁོ་ན་ཉིད་ཚིག་ཐམས་ཅད་ཨཱ་ལི་ཀཱ་ལི་ལས་ཡང་དག་པར་འབྱུང་བས་སྒྲ་ཐམས་ཅད་ཀྱང་ཕོ་མོ་མ་ནིང་སྟེ་སྔགས་སུ་ཤེས་པར་བྱའོ། །སེམས་ལ་དམིགས་པའི་མན་ངག་ནི། བདེ་བ་ཆེན་པོའི་མན་ངག་གོ། །ཞེས་པ་ནི་སེམས་རྣམ་པར་དབེན་པ་ལ་གཉིས། ཤེས་བྱ་སེམས་ཀྱི་མཚན་ཉིད་ཤེས་པ་དྲི་མ་དང་བཅས་པའི་གནས་ལུགས་ཏེ། དེ་ལ་གཉིས་རྟོག་མེད་ཀུན་ཏུ་སྣང་བའི་སེམས་ནི། རིག་པ་བྱང་ཆུབ་ཀྱི་སེམས་གསལ་ལ་རྟོག་པ་མེད་པ་ཡུལ་ལ་འཇལ་ན་སྒོ་ལྔའི་ཤེས་པ་ལ་རྟོག་མེད་དུ་སྤྱོད་པའོ། །
2-1-10b
རྟོག་བཅས་རང་བཞིན་གྱི་སྣང་བ་ནི་ཤེས་པ་གཟུང་འཛིན་གྱིས་བསྡུས་པ་རང་བཞིན་བརྒྱད་ཅུ་པོ་རྣམས་ཡིན་ནོ། །སེམས་ལ་དམིགས་པའི་ཡེ་ཤེས་ཀྱི་མཚན་ཉིད་ནི་སེམས་དེའི་ཆོས་ཉིད་ཇི་ལྟར་རྟོགས་པ་སྟེ། ཆོས་ཅན་སེམས་ཀྱི་མཚན་ཉིད་ཇི་ལྟ་བ་བཞིན་དུ་རྟོགས་པ་ནི། སེམས་འོད་གསལ་དུ་རྟོགས་པ་སྟེ། བླ་མའི་བྱིན་རླབས་ཀྱིས་རྟོགས་པར་འགྱུར་བའོ། །སེམས་དེའི་ཆོས་ཉིད་རིག་པའི་ཡེ་ཤེས་ལམ་དུ་བྱེད་པ་ལ་བདེ་བ་ལམ་དུ་སློང་དགོས་པས། ཆོས་ཐམས་ཅད་རླུང་ལ་རག་ལུས་པས་ན་ཡེ་ཤེས་ཀྱི་རླུང་ལམ་དུ་བྱེད་པ་སྟེ། གཡས་གཡོན་འཕོ་དུས་རླུང་གནད། ཨ་བ་དྷཱུ་ཏི་ནས་རྒྱུ་བ་ངོས་གཟུང་བའོ། །གསལ་བ་རང་རིག་པ་བདེ་སྟོང་དུ་རྟོགས་པར་བྱ་བ་ནི། བདེ་བ་ལམ་དུ་བྱ་བ་སྟེ། ལས་ཀྱི་ཕྱག་རྒྱ་ལ་བརྟེན་པའི་འོག་སྒོ་གཞན་ལུས་ཤེས་རབ་མ་ལ་བརྟེན་ནས་སྣང་བ་གསུམ་ཡེ་ཤེས་སྐད་ཅིག་མ་ལས་དགའ་བའི་ཡེ་ཤེས་ངོས་འཛིན་དང་། ཡང་སྟེང་སྒོ་རྣམ་པར་གྲོལ་བ་རང་ལུས་ཐབས་ལྡན་བདེ་ཆེན་བྱང་ཆུབ་སེམས་ཀྱི་མན་ངག་ཅེས་བྱ་སྟེ། བདེ་བ་བསྡུས་པ་དང་། གཟུང་བ་དང་། བཟློག་པ་དང་། བདེ་བ་སྤྲོ་བའི་ཚུལ་གྱིས་ལམ་དུ་སློང་བ་ལྷན་ཅིག་སྐྱེས་པའི་ཡེ་ཤེས་མངོན་དུ་འཆར་བར་འགྱུར་བ་ནི། གསང་བ་རིན་པོ་ཆེ་སྦས་པའི་འཁོར་
2-1-11a
ལོ་ལ་བརྟེན་ནས་རིན་ཆེན་འཁོར་ལོའི་འཕྲུལ་འཁོར་ཡན་ལག་གསུམ་དང་བཅས་པས་སྟེང་འོག་གཉིས་ཀ་ཐུན་མོང་གི་གདམས་པ་བསྟན་པའོ། །བླ་མའི་ཞལ་ལས་ཤེས་པར་བྱ། ཞེས་པ་བདེ་བ་སྤྲོས་བྲལ་རྟོག་མེད་དུ་འཆར་བའི་གདམས་པའི་དོན་ཏོ། །ཕྱག་རྒྱ་ཆེན་པོའི་མན་ངག་ནི། །མན་ངག་ཚིག་བསྡུས་དག་ལས་ཤེས། །ཤེས་པ་སློབ་དཔོན་ཆེན་པོ་ལྭ་བ་པའི་བཞེད་པས། ཚིག་སྡེ་བཞི་གསུམ་བཅུ་གཉིས་སུ་བསྡུད་པ་ནི། གཞི་ལམ་འབྲས་བུ་གསུམ་ལས། གཞིའི་ཆོས་ལ་བཞི། ངོ་བོ་སྤྲོས་པ་དང་བྲལ་བ། རང་བཞིན་དྲི་མ་མེད་པ། མཚན་ཉིད་སྣང་སྟོང་དབྱེར་མེད་ཐབས་དང་ཤེས་རབ་གཉིས་སུ་མེད་པའོ། །ལམ་གྱི་ཆོས་བཞི་ནི། ཟག་པ་མེད་པའི་བདེ་བ་ཆེན་པོ། གསལ་ལ་རང་འབྱུང་བ། མ་སྐྱེས་ལྷུན་གྱིས་གྲུབ་པའི་མི་རྟོག་པ། བདེ་གསལ་མི་རྟོག་པ་དབྱེར་མེད་ཟུང་དུ་འཇུག་པའོ། །འབྲས་བུའི་ཆོས་བཞི་ནི། སྐུ་གསུམ་དབྱེར་མེད་པ་བདེ་བ་ཆེན་པོ་འོད་གསལ་བ་ཟུང་དུ་འཇུག་པའི་ཡེ་ཤེས། སོ་སོར་རང་རིག་གཡོ་བ་མེད་པའི་ཕྲིན་ལས། མི་གནས་པའི་མྱ་ངན་ལས་འདས་པ་རྣམ་པར་དག་པའི་མཛད་པའོ། །དེས་ཕྱག་རྒྱ་ཆེན་པོའི་དོན་བསྡུའོ། །ཡང་ན་ཐོས་བསམ་སྒོམ་གསུམ་
2-1-11b
དང་། རྟོགས་པའི་ཤེས་རབ་གསུམ་དང་། འབྲས་བུ་སྐུ་གསུམ་མོ།། །།
༄། །གཏུམ་མོ་འོད་གསལ་སྦྱང་བ།
ད་ནི་ལམ་དངོས་སྟོན་པར་བྱེད་པ་ལས། གཏུམ་མོ་འོད་གསལ་སྦྱང་བ་ལ། །ཞེས་པ་སྔར་བསྟན་རླུང་རྡོ་རྗེའི་བཟླས་པ་ངག་རྣམ་པར་དབེན་པ་ལམ་དུ་ཁྱེར་བ་ནི་ཐམས་ཅད་རླུང་ལ་རག་ལུས་པ་སྟེ། ལྟེ་བའི་རྩ་མདུད་རང་བཞིན་གྱི་གཏུམ་མོ་ཨ་ཐུང་ངུ་དེ་ལ་གནད་དུ་བསྣུན་པ་ནི་ལས་ཉོན་མོངས་རྣམ་རྟོག་ཕྲ་རགས་ཐམས་ཅད་ལ་དཔའ་བས་ན་གཏུམ་མོ་ཞེས་བྱ། འོད་གསལ་ནི་ལྷན་ཅིག་སྐྱེས་པ་དྲི་མ་མེད་པར་རྟོགས་པ་སྟེ། དེ་དག་རྟོགས་པར་བྱེད་པ་ལ་ཐོག་མར་སྒྱུ་ལུས་རྨང་རྡོ་དང་འདྲ་བ་དགོས་པས་གོང་མ་གཉིས་པོ་སྦྱང་བ་ལ། སྒྱུ་མ་ལྟ་བུའི་ལུས་བསྒོམས་པ་ཞེས་པས་ཆོས་ཐམས་ཅད་ཀྱི་ཤེས་བྱ་སྒྱུ་མ་ལྟ་བུ་སྟེ། ཀུན་རྫོབ་འོད་གསལ་དུ་འཇུག་པར་བྱེད་པ་ལ། སློབ་པ་དང་མི་སློབ་པ་གཉིས། ཞེས་པས་སྒྱུ་ལུས་ཀྱི་སྐབས་སུ་བར་དོ་སྦྱོང་བྱེད་ཀྱི་ལམ་སློབ་པའི་ཟུང་འཇུག་ཡིན་ལ། འབྲས་བུ་མཐར་ཐུག་ཏུ་གྱུར་པ་མི་སློབ་པའི་ཟུང་འཇུག་གོ། །དེ་ལ་འདིར་སློབ་པའི་ཟུང་འཇུག་ལ་ཡང་རྣམ་པ་གཉིས་ཏེ། ཐེག་པ་ཐུན་མོང་བ་དང་མཐུན་པར་ལམ་བགྲོད་ནས་རྡོ་རྗེ་ཐེག་པར་ལྷའི་སྐུ་སྣང་སྟོང་སྒྱུ་མ་ལྟ་བུ་བསྒོམ་པ་མངོན་པར་རྟོགས་པའི་རིམ་པ་དང་། ཐུན་མོང་མ་
2-1-12a
ཡིན་པ་གསང་ཆེན་གྱི་ལམ་དུ་རང་ཉིད་ལྷག་པར་གནས་པ་རང་རིག་རང་གསལ་བ་གཉིས་མེད་འོད་གསལ་བའི་ངང་དུ་རྟོགས་པར་བྱེད་པའོ། །མངོན་པར་རྟོགས་པའི་རིམ་པ་སྟོན་པ་ལ། དཔལ་གསང་བ་འདུས་པའི་པཉྩ་ཀྲ་མ་ལས་རིམ་པ་གསུམ་པ་ཀུན་རྫོབ་སྒྱུ་མ་ལྟ་བུར་ངོ་སྤྲོད་པ་ནི་དུས་ནམ་གྱི་ཚེ་{ན་}ཞེ་ན། གསང་བའི་དབང་བསྐུར་བའི་ཚེ་སྣང་ལ་རང་བཞིན་མེད་པ། གསལ་ལ་རྟོག་པ་མེད་པ་མེ་ལོང་ནང་གི་གཟུགས་བརྙན་ཏེ། རྡོ་རྗེ་སེམས་དཔའ་ལེགས་པར་བྲིས་པ་ནི། མེ་ལོང་གཡའ་དག་པ་དྲི་མ་མེད་པ་དེའི་ནང་དུ་འཆར་དུ་བཅུག་ནས། བླ་མ་ལ་སྒྱུ་ལུས་ཀྱི་སྒོ་ནས་བསྟོད་པ་བྱ་སྟེ། དེའི་དུས་ཀྱི་གཟུགས་བརྙན་ནི་གསལ་བར་སྣང་དང་མཚུངས་ཞེས་བྱ་བ་ནས། སྒྱུ་མའི་དཔེ་བཅུ་གཉིས་ཏེ། སྣང་ལ་རང་བཞིན་མེད་པ་འཇའ་ཚོན། གསལ་ལ་རྟོག་པ་མེད་པ་མེ་ལོང་ནང་གི་གཟུགས་བརྙན། སྣང་ཞིང་སྐྱེ་བོ་བསླུ་བྱེད་སྒྱུ་མ། སྣང་ཞིང་ཁྱབ་པ་ཆུ་ཟླ། འཁྲུལ་པའི་རང་བཞིན་མིག་ཡོར། སྣང་ཡང་དོན་བྱེད་མི་ནུས་པ་དྲི་ཟའི་གྲོང་ཁྱེར། མི་རྟག་པ་ཆུ་བུར། བག་ཆགས་ཀྱིས་བདེན་པར་འཛིན་པ་རྨི་ལམ། མེད་བཞིན་སྣང་བར་བྱེད་པ་ནམ་མཁའི་སྐྲ་ཤད། རྟོག་པ་མེད་པར་སྤྱོད་པའི་བྲག་ཆ། དུས་ཀྱི་
2-1-12b
མི་རྟག་པ་སྨིག་སྒྱུ་(རྒྱུ་)མི་གནས་པའི་རང་བཞིན་སྤྲིན་ལ་སོགས་པ་ཐམས་ཅད་ཀྱི་སྒོ་ནས་རྟོགས་པར་བྱ་བ་ནི། དཔེའི་གཙོ་བོ་གསུམ་གྱིས་སོ།། །།
༄། །བླ་མའི་མན་ངག་ལ། མ་བསྒོམ་པར་སངས་རྒྱ་བ་འཕོ་བའི་གདམས་པ།
འདི་ལ་བླ་མའི་མན་ངག་ལྟར་ན་ལྷང་མ་ལྷང་ཚེར་ལ་རྨ་བྱའི་ཁྲག་གིས་བཛྲ་ས་ཏྭ་བྲིས་ནས་ཏིང་ཕོར་དུ་ཆུ་ནང་དུ་བཅུག་སྟེ། ཉི་མ་ལ་བཞག་ན་དེའི་འོད་རྩིག་ངོས་ལ་ཕོག་པ་དེ་ལ་དགའ་མི་དགའི་སྤྱོད་པ་སྣ་ཚོགས་བྱས་ལ། དེ་ལ་དགའ་མི་དགའ་གང་ཡང་མི་འདུག་ན་དེ་དང་ཐ་མི་དད་པར་བསྒོམ། དེ་ལ་ཡང་སྦྱངས་པས་རྡོ་རྗེ་སེམས་དཔའ་དེ་དང་ཐ་མི་དད་པས་དེ་ཁོ་ན་ལ་བསླབ་ཅིང་བསྒོམ་མོ། །འདི་ནི་ཀུན་རྫོབ་སྒྱུ་མ་བདེན་པས་སྦས་པ་སྟེ་རང་བཞིན་མེད་པ་གཏན་ལ་ཕབ་པའོ། །དེ་ལ་རང་ཉིད་ལྷག་པར་གནས་པའི་ལམ་ལ་ཕྱི་དོན་བཞི་སྟེ། མ་བསྒོམ་པར་སངས་རྒྱ་བ་འཕོ་བའི་གདམས་པ་དང་། དེའི་ཡན་ལག་གྲོང་འཇུག་དང་། བག་ཆགས་དག་པས་འཚང་རྒྱ་བ་རྨི་ལམ་དང་། དོན་ཤེས་པས་འཚང་རྒྱ་བ་བར་དོ་དང་བཞིའོ། །རྣམ་ཤེས་གོང་དུ་འཕོ་བ་ལ་རྣམ་པ་གསུམ་སྟེ་བསྐྱེད་པའི་རིམ་པའི་ཚུལ་ལ་འཕོ་བ་དང་། སྒྱུ་མ་དངོས་ཀྱི་འཕོ་བ་དང་། འོད་གསལ་བའི་འཕོ་བ་བསྟན་པའོ། །
༈ བསྐྱེད་པའི་རིམ་པའི་ཚུལ་ལ་འཕོ་བ།
དེ་ལ་དང་པོ་དབང་པོ་ཐ་མ་བསྐྱེད་པའི་རིམ་པའི་ཚུལ་ལ་འཕོ་བ་བསྟན་པ་ནི། 
2-1-13a
ཀྵུཾ་ལ་སོགས་པའི་ཡི་གེ་ཡིས། །བུ་ག་དག་ཀྱང་དགག་བྱས་ཏེ། །རང་གི་སེམས་ནི་ལྷ་ཡི་སྐུ། །ཞེས་གསུངས་པས་གནས་དབེན་པར་ཕྱིན་ཏེ་ཐུན་མོང་བྱ་བའི་རིམ་པ་སྔོན་དུ་འགྲོ་བའི་རང་སྟན་བདེ་བ་ལ་འདུག་ནས་བྱམས་སྙིང་རྗེ་སྔོན་དུ་འགྲོ་བས་ཐོག་མར་བླ་མ་དྲན་པར་བྱ་སྟེ། རང་ལུས་ལྷའི་སྐུ་སྣང་ལ་རང་བཞིན་མེད་པ་སྒྱུ་མ་ལྟ་བུར་སྐད་ཅིག་གིས་བསྐྱེད་ལ། དམ་ཚིག་སེམས་དཔའི་ཐུགས་ཀའི་ས་བོན་ལས་འོད་ཟེར་དཔག་ཏུ་མེད་པ་བྱུང་བས། ཡེ་ཤེས་སེམས་དཔའ་རང་བཞིན་གྱི་གནས་ནས་བཀུག་སྟེ་གཉིས་སུ་མེད་པར་བསྟིམ། དེ་ལ་དབང་བསྐུར་བ་དང་། རྒྱས་གདབ་པ་བྱ། དེ་ནས་རང་གི་ལུས་དེའི་སྤྱི་བོ་དང་བཤང་ལམ་གཉིས་སུ་ཀྵུཾ་དམར་པོ། སྣ་བུག་གཉིས་དང་རྣ་བ་གཉིས་ལ་ཡུམ་བཞི་ལྗང་གུ། ལྕེ་ལ་སུཾ་དཀར་པོ། མིག་གཉིས་དང་སྨིན་མཚམས་དང་གསུམ་དུ་ཧཱུྃ་གསུམ་ནག །ཆུ་ལམ་སུཾ་དཀར། དེ་ནས་མགྲིན་པར་སྨྼྻུཾ་ཐོང་གར། ཡྨྼྻུ་སྙིང་གར་ཧྨྼྻུ། ལྟེ་བར་ཀྵྨྼྻུཾ། དེ་རྣམས་སྒོའི་བུ་ག་དགག་པར་བྱའོ། །དེ་དག་མ་བཀག་ན་ཁམས་གསུམ་ལས་མི་འདའ་བར་ཤེས་པར་བྱའོ། །འཇའ་ཚོན་ལྟ་བུར་བསྒོམ་པའམ། ཞེས་པས་ལྷའི་སྐུ་དེ་གོང་དུ་བསྟན་པའི་སྒྱུ་མའི་དཔེ་བཅུ་གཉིས་ཀྱིས་རྟོགས་པར་བྱའོ། །
2-1-13b
ཡང་ན་ཧཱུྃ་ལ་བསྡུས་བྱ་སྟེ་ཤེས་པར་རང་གི་དབུགས་དང་ཤེས་པ་ཐམས་ཅད་བསྡུ་སྟེ་རྩ་དབུ་མ་ནས་རྒྱུད་དེ། མདའ་འཕངས་པ་བཞིན་དུ། ཚངས་པའི་བུ་ག་དག་ནས་བསྟོན་ཏེ། ཞེས་པ་ཁམས་གསུམ་བརྟན་གཡོ་ཐམས་ཅད་ལྷའི་སྐུ་གདན་དང་བཅས་པ་ལ་འདུས། དེ་ཡང་རིམ་གྱིས་བསྡུས་པས་ཧཱུྃ་དེ་ལ་འདུས། ཧཱུྃ་ཡེ་ཤེས་ལྔའི་ངོ་བོ་དེ་ནམ་མཁའ་ལ་ལྡིང་བས་འཕོ་བ་སྟེ་འོག་མིན་བདེ་བ་ཅན་གྱི་གནས་སུ་འཕོ་བས་ན། འོག་མིན་གནས་སུ་ཡང་དང་ཡང་། རྒྱུན་མི་འཆད་པས་གནས་པར་བྱ་བ་ནི་ཐུན་བཞིར་དེ་ལ་གོམས་པར་བྱ་བ་སྟེ། དེ་ལྟར་སྔར་ནས་གོམས་པས་གོང་གི་མན་ངག་གི་འོག་མིན་དུ་ཤེས་པ་བརྟན་པར་གྱུར་ནས། ཐ་མ་འཆི་བའི་དུས་ཀྱི་ཚེ་ཕྱི་ནང་གསང་བའི་འཆི་རྟགས་རྣམས་བརྟགས་ནས། ཤེས་པས་འཆི་བ་སླུ་བའི་སྦྱོར་བས་ཅི་བྱས་ཀྱང་མ་སླུས་ན་འཕོ་ཀར་ཤེས་པ་གནས་སུ་སྐྱལ་བ་གཅེས་པས་འཆི་ཁའི་དུས་སུ་སྔར་གྱི་དམིགས་པ་གསལ་བར་བྱས་ལ་ཡི་དམ་དང་བླ་མ་སྤྱན་དྲངས་ལ། མཆོད་པ་དང་ག་ཎ་ཙཀྲ་ཕུལ་ནས་སྔར་བཞིན་སྒོ་དགུ་བལྟམས་ཏེ། དབུ་མའི་ལམ་སྤྱི་བོ་བདེ་བ་ཆེན་པོའི་འཁོར་ལོ་ནས་རིག་པ་དྲིལ་ཏེ་མདུན་གྱི་བླ་མ་ཡི་དམ་གང་མོས་ཀྱིས་ཐུགས་ཀར་བཞུགས་པ་སྟེ། དེ་ལྟར་
2-1-14a
བྱས་པས་འཕོ་བར་འགྱུར་ཞེས་པའི་དོན་ནི་འབྲས་བུ་སྤྲུལ་བའི་སྐུ་ཐོབ་ནས་འགྲོ་བ་སེམས་ཅན་གང་ལ་གང་འདུལ་དུ་དོན་བྱེད་པའོ། །
༈ སྒྱུ་མ་དངོས་ཀྱི་འཕོ་བ།
སྒྱུ་མ་དངོས་ཀྱི་འཕོ་བ་ནི། ཞེས་པ་དབང་པོ་འབྲིང་གིས་ལམ་དུ་བྱ་བ་གཅིག་བསྟན་ཏེ། འོག་ནས་འབྱུང་བའི་རྨི་ལམ་ལ། །གོམས་པར་བྱས་ཏེ་སུམ་ཅུ་ནི། །རྩ་གསུམ་གནས་སུ་འཕོ་བྱ་སྟེ། །ཞེས་པས་སྤྱིར་སྔགས་ཀྱི་ལུགས་ཀྱིས་འོག་མིན་ཡ་ཀི་ན་མེད། རང་གི་ཤེས་པ་བར་མ་དོ་ན་གནས་པ་དེ། སྐད་ཅིག་མ་བར་མ་དོ་བདེ་སྟོང་དུ་ངོ་ཤེས་པར་བྱ་སྟེ། སྔར་རྨི་ལམ་ལ་གོམས་པའི་གནད་རྨི་ལམ་སྒྱུ་མ་འོད་གསལ་དུ་འཆར་བ་དེས་བར་མ་དོར་ངོ་ཤེས་པ་འབྱུང་སྟེ་འཆི་ཀ་ལ་འཕེན་པ་གཏང་བ་དང་། ཨར་མོ་སརྦ་ཀམཱ་ལ་ནི་ག་གི་རྡོ་ཤི་ལཱ་ཏ་ལ་ལེབ་ཀྱི་སྟེང་རང་རྡོ་རྗེ་འཆང་དུ་མོས་ནས་མ་ཧཱ་མུ་ཏྲ་བསྒོམ་པར་བསམས་པ་ལས། གོམས་པ་ཁྲིད་དེ་བསྒོམས་གྱུར་ན་ཞེས་པ་ནི་བསྐྱེད་པའི་རིམ་པ་ལྷའི་འཁོར་ལོའམ། རྩ་ལ་བརྟེན་པའམ་རླུང་ལ་བརྟེན་པའམ། བྱང་ཆུབ་སེམས་ལ་བརྟེན་པའམ། འོད་གསལ་དང་སྒྱུ་ལུས་རྨི་ལམ་དང་བར་དོ་ལ་སོགས་པ་གང་གོམས་པ་དེ་དག་གི་ཉམས་ཁྲིད་དེ་བསྒོམས་ན་ཞེས་སུམ་ཅུ་རྩ་གསུམ་དེར་ཨར་མོ་ལི་ཀའི་སྟེང་དུ་བསྒོམས་ན། དེར་འདོད་
2-1-14b
ཡོན་ལམ་དུ་ཁྱེར་བ་རྣམས་བདེ་སྟོང་སྐྱེ་བའི་གནས་ཡིན་པས་ཤེས་པ་དབང་པོ་ཡུལ་ལ་སྤྱོད་པ་ཚོགས་བདེ་བར་རོལ་བ་སྟེ། རྣམ་པར་མི་རྟོག་པ་ལྷག་མཐོང་གི་ཡེ་ཤེས་མཆོག་ཐོབ་ནས་ནི། གང་ཟག་བརྩོན་འགྲུས་ཅན་དེ་ཚོ་འདི་ཉིད་ལ་སངས་རྒྱས་ལོངས་སྤྱོད་རྫོགས་པའི་སྐུ་ཐོབ་པར་འགྱུར་ཏེ། གསང་བའི་ལམ་འདི་ལ་ཐེ་ཚོམ་མེད་པའོ། །སྔགས་པའི་འགྲོ་ས་མཆོག་ཡིན་ཏེ། །མཚན་ཉིད་པ་འདི་ལྟུང་བར་འགྱུར། །ཞེས་པས་གསང་སྔགས་པ་རྣམས་རྒྱུ་བདེ་བས་འབྲས་བུ་བདེ་བ་བསྒྲུབ་པ་དང་། མཚན་ཉིད་པ་རྒྱུ་སྡུག་བསྔལ་ལམ་དཀའ་ཐུབ་དང་དཀའ་སྤྱད་ལམ་དུ་བྱས་པས་སྐུ་གསུམ་ཐོབ་པར་འདོད་པ་སྟེ། འདིར་ལམ་གོང་མ་མི་ཐོབ་པར་སྤྱད་ན་ལྷུང་བར་འགྱུར་ཏེ་གོལ་ནས་འགྲོ་ཞེས་པའི་ཐ་ཚིག་གོ། །
༈ འོད་གསལ་བའི་འཕོ་བ་བསྟན་པ།
དེ་ལ་དབང་པོ་ཡང་རབ་ལམ་འོད་གསལ་ལ་སྦྱངས་ཏེ་འཕོ་བ་བསྟན་པ་ནི། འཆི་བའི་དུས་ནི་ཤེས་བྱ་སྟེ། །ཞེས་པ་འདིར་སྐྱེ་བ་འདི་ལ་ཤེས་པའི་འོད་གསལ། གཉིད་ཀྱི་འོད་གསལ། བསམ་གཏན་གྱི་འོད་གསལ། གཉིད་ཀྱི་འོད་གསལ་དུ་འཕོ་ནུས་ཤིང་སེམས་རང་བཞིན་མི་རྟོག་པ་ལ་སེམས་གནས་སུ་བཏུབ་པ། དེས་ཕྱི་ནང་གསང་བ་དེ་ཁོ་ན་ཉིད་འཆི་རྟགས་རྣམས་ཤེས་པས་འཆི་ཁའི་དུས་ཀྱི་ཚེ། ལུས་ཀྱི་རྩོལ་
2-1-15a
བ་དག་གིས་ནི། །ཞེས་པ་རང་དབང་ཡོད་པར་བྱ་བའི་ཆེད་དུ་ལུས་བསམ་གཏན་གྱི་ཡན་ལག་ལྔ་ལྡན་པས་དབུགས་ཀྱང་རླུང་ལྔ་དབུ་མར་བཞུག་པ་སྟེ། དེ་ཡང་འོད་གསལ་བར་ནི་གཞུག་བྱ་སྟེ། །ཞེས་པ་རྩ་རླུང་བྱང་ཆུབ་ཀྱི་སེམས་ཀྱི་རྟེན་འབྲེལ་ལ་བརྟེན་ནས་སྒྱུ་མ་ལྟ་བུའི་སྐུ་དེ་རང་བཞིན་གྱི་འོད་གསལ་བར་རྟོགས་པས་བར་དོ་དང་པོར་སེམས་སྣང་བ་རྣམ་པ་གསུམ་གྱི་འོད་གསལ་བར་རྟོགས་པས་བར་དོ་དང་པོར་སེམས་སྣང་བ་གསུམ་གྱི་སྒོ་ནས་མྱ་ངན་ལས་འདས་པ་ཐོབ་སྟེ། བར་དོར་མྱ་ངན་འདའ་བ་ཡིན་ཞེས་པའི་དོན་ཏེ་དབང་པོ་རབ་འོད་གསལ་དྲི་མ་མེད་པ་དག་པ་ཆོས་ཀྱི་སྐུའི་ངང་དུ་འཚང་རྒྱ་བར་འགྱུར་བ་ཡིན་ནོ། །བསླབས་ནས་འཕོ་བ་དེ་རྣམས་ཡིན། །ཞེས་པ་སྔར་གྱི་ནས་རིམ་གྱིས་སྦྱར་ཏེ། བསླབས་ནས་འཕོ་བས་སློབ་པའི་ཟུང་འཇུག་ཡིན་པས་ན། འོད་གསལ་བ་ལ་སེམས་གནས་ན། །སློབ་བཞིན་པ་ཡི་རྣལ་འབྱོར་ཆེ། །ཞེས་གསུངས་པའོ། །མ་བསླབ་པར་ཡང་འཕོ་བ་ཡོད། །ཅེས་པ་སྲིད་པ་འཆི་ཀའི་དུས་སུ་འབྱུང་བ་ནི། སྨིན་མཚམས་དང་གསང་གནས་ཀྱི་ཐིག་ལེ་དཀར་དམར་གཉིས་པོ་སྙིང་གར་འདུས་པས་ཁྱབ་བྱེད་ཀྱི་རླུང་དང་རྣམ་པར་ཤེས་པ་འདྲེས་པའི་ཐིག་ལེ་ལས་
2-1-15b
བདེ་བ་དང་གསལ་བ་དང་། མི་རྟོག་པ་རྒྱུད་ཀྱིས་དག་པ་སྐྱེས་པའི་མཐར་ལྷན་ཅིག་སྐྱེས་པའི་རང་བཞིན་གྱི་འོད་གསལ་འཆར་བས་ནས། ཐབས་དང་ཤེས་རབ་ཟུང་དུ་འཇུག་པ་སྟེ། །ཟུང་འཇུག་ཏིང་འཛིན་ལ་གནས་ན། །སླར་ཞིང་གང་ལའང་མི་སློབ་བོ་ཞེས་པས་དེ་ལྟ་ན་མཉམ་བཞག་དང་རྗེས་ཐོབ་རོ་གཅིག་ཟུང་དུ་ཆུད་པས་གཉིས་མེད་རྟོགས་པ་མཐར་ཕྱིན་པས་སྐུ་བཞི་རོ་མཉམ་དུ་འགྱུར་བའོ། །དེའི་འཕོ་བ་བསྟན་པའོ། །
༄། །གྲོང་འཇུག་བསྟན་པ།
གྲོང་འཇུག་བསྟན་པ་ནི། དེ་ལ་གྲོང་འཇུག་པ་ནི། །ཞེས་པ་རང་ལུས་རྒས་པ་གཞན་ལུས་ལ་སྤོ་བ་ནི། གནས་དབེན་པར་ཕྱོགས་ནས་བསྒྲུབ་པ་བྱ་བ་ནི། མདུན་དུ་དམིགས་པ་གསལ་བྱས་ལ། །ཞེས་པ་རང་ལྷ་རིགས་ལྔ་གང་ཡིན་པའི་ས་བོན་གྱི་ཡི་གེ་དང་དབུགས་དང་ཤེས་པ་ཐོན་པར་གཏད། དམིགས་པ་ལ་ཟིན་དུས་མི་གཞུག །གཞན་ལུས་ལ་སྤྲོས་ཤིང་རིག་པ་རྟ་ལ་སྐྱོན་ལ་ཕ་རོལ་ལ་འཕང་། དབུགས་དང་སེམས་ནི་མ་ཡེངས་པར་གཏད་ནས་ཤེས་སྲོག་ཆགས་ཀྱི་རོ་ལ་ཤེས་པ་གཏད་ནས་ཉམས་སད་པར་བྱའོ། །དེ་ལ་ཡུན་དུ་གོམས་པར་གྱུར་ན། ཤེས་པ་བྱུང་ནས་ཇེ་གསལ་ཇེ་གསལ་དུ་འགྱུར་བ་ནི། འཇུག་པ་མྱུར་བ་འགྲོ་འོང་གཅིག་ཏུ་དྲིལ་བས་ལམ་དུ་
2-1-16a
སློང་སྟེ། དེ་ལ་ཡུན་དུ་གོམས་བྱས་ནས། །ཞེས་པ་དང་པོ་དེ་ལ་བསླབ་པ་དང་། དེ་ནས་སྦྲང་བུའི་རོ་ལ་སོགས་དང་། དེ་ནས་བྱིའུ་ལ་སོགས་པ་ལ་ཉམས་སད་པས་རྟགས་བྱུང་བ་དང་། དེ་ལ་ཡུན་དུ་གོམས་བྱས་ནས། །རང་གི་ཕུང་པོ་དོར་བྱ་སྟེ། །ཤེས་པ་རང་ལུས་བཞག་ནས། །བསོད་ནམས་ཅན་གྱི་ལུས་བླངས་ཏེ། །རྒྱལ་པོའམ་བློན་པོའམ་བྲམ་ཟེའམ་པཎྜི་ཏ་ལ་སོགས་པའི་འགྲོ་བ་སེམས་ཅན་གྱི་ལུས་ལ་འཕོ་ནས་ལངས་ཏེ། སེམས་ཅན་དོན་ནི་མ་ལུས་བྱ། །ཞེས་པས་འགྲོ་བ་སེམས་ཅན་གྱི་དོན་དུ་ལུས་ཡང་དང་ཡང་དུ་རྗེས་ལ་སེམས་ཅན་གྱི་དོན་འབའ་ཞིག་བྱ་བར་གསུངས་པ་ཡིན་ནོ། །དེས་ན་གྲོང་དུ་འཇུག་པ་འདི་སྟོབས་ཤིན་ཏུ་ཆེའོ། །
༄། །བག་ཆགས་དག་པས་འཚང་རྒྱ་བ་རྨི་ལམ།
རྨི་ལམ་གནད་དུ་བྱ་བ་ལ་དོན་རྣམ་པ་ལྔས་ལམ་དུ་བླང་བ་ནི། དང་པོར་གསུངས་པ། རྨི་ལམ་ཡང་རྣམ་ལྔ་སྟེ། །དྲན་དང་སྒྱུ་མར་ཤེས་པ་དང་། །སྦྱང་དང་གོམས་པ་འཁྲིད་པ་དང་། །གོང་དུ་འཕོ་བར་ཤེས་པར་བྱ། །ཞེས་གསུངས་པ་ལ། དང་པོ་དྲན་པ་དང་འདུན་པ་སྔོན་དུ་བཏང་ནས་ཤེས་བཞིན་གྱི་བྱ་ར་བ་གཟུང་བ་ནི། དྲན་པ་ཞེས་བྱའི་བསྒོམ་པ་ནི། །གཉིད་མ་ལོག་པའི་དུས་སུ་ཡང་། །འདུན་པ་དག་ནི་སྔོན་བཏགས་ནས། །ཤེས་པ་ཉིན་པར་ཚོགས་དྲུག་ཡུལ་
2-1-16b
གྱི་སྣང་བ་ལ་ཅི་མཐོང་བ་ཐོས་པ། རིག་པ་ཐམས་ཅད་རྨི་ལམ། སྒྱུ་མ་ཙམ་དུ་ལོངས་སྤྱད་དེ་རྨི་ལམ་ལ་རྨི་ལམ་ཉིད་དུ་ངོ་ཤེས་པར་བྱའོ་སྙམ་པའི་དྲན་པ་བྱའོ། །ལོག་ཀ་མ་ཡི་ཤེས་པ་ནི། །དྲན་པ་ཡང་དང་ཡང་སྒུགས་ལ། །ཞེས་པས་སྲོད་ཀྱི་དུས་སུ་མགྲིན་པའི་ཨ་ནུ་ཏ་ར་འམ། ཡང་ན་ཨ་དམར་པོ་དྷཱུ་ཏིའི་ནང་ལོངས་སྤྱོད་ཀྱི་དབུས་ན་འདུག་པ་ལ་ཤེས་པ་གཏད་པར་བྱ། ཡང་དེ་ལ། དྲན་པ་ཡང་དང་ཡང་སྒུགས་པ་ལ། །སྒུགས་པས་ལོག་རེས་ལན་རེ་བཞིན། །རབ་འབྲིང་སད་དུས་འབྱུང་བར་འགྱུར། །ཞེས་གསུངས་པས་དཔལ་གསང་བ་འདུས་པའི་ལེའུ་བཅོ་ལྔ་པ་ནས་གསུངས་པ། དེ་བརྟན་པར་བྱེད་པ་ལ་སྨིན་མཚམས་སུ་ཐིག་ལེ་དཀར་པོ་སྲན་མ་ཙམ་ལ་ཤེས་པ་གཏད་དེ། དེ་ལ་གོམས་པར་གྱུར་པ་ན། །དེ་ལྟར་དྲན་པས་བརྟན་གྱུར་ནས། །སྒྱུ་མ་དག་ཏུ་ཤེས་བྱ་སྟེ། །ཞེས་པ་རྨི་ལམ་གྱི་སྣང་བ་གང་ཡིན་པ་དེ་ཉིད་དང་པོ་རྨི་ལམ་དུ་ཤེས་ནས་དེ་ནས་རྨི་ལམ་སྒྱུ་མར་ཤེས་པས། མ་ལོག་པ་ཡི་དུས་སུ་ཡང་། །སྣང་སྲིད་སྒྱུ་མར་ཤེས་བྱ་སྟེ། །སྒྱུ་མ་དངོས་ནི་རྨི་ལམ་ཡིན། །ཞེས་པས་ནུབ་མོ་རྨི་ལམ་རྨི་ལམ་དུ་ཤེས་པས་སྒྱུ་མར་སྦྱང་། རྨི་ལམ་དང་སྒྱུ་མ་གཉིས་ཀར་གོ་བས་ན་ཁམས་གསུམ་བསྟན་གཡོ་ཐམས་
2-1-17a
ཅད་སྒྱུ་མར་ཤེས་པས། ཉིན་མོའི་སྣང་བ་སྒྱུ་མ་རྨི་ལམ་དང་བསྲེས་ལ་སྦྱང་། དེས་དང་པོ་དྲན་པའི་ལྕགས་ཀྱུས་གཟུང་བ་བསྟན་པའོ། །གཉིས་པ་སྒྱུ་མར་བསླབ་པ་ནི། འདི་ཉིད་སྒྱུ་མར་མ་ཤེས་པས། །བར་དོ་སྒྱུ་མར་མ་ཤེས་ན། །བར་དོའི་སྲིད་པ་མ་ཁེགས་པས། །སྐྱེ་བ་ཡང་དང་ཡང་བླངས་ཏེ། །ཁམས་གསུམ་འཁོར་བར་འཁྱམས་པ་ཡིན། །ཞེས་པ་ད་ལྟ་སྐྱེ་ཤིའི་བར་དོ་འདི་ལ་སྣང་བ་ཐམས་ཅད་སྒྱུ་མ་རྨི་ལམ་ཙམ་དུ་ངོ་མ་ཤེས་པས་རིག་པ་ཨ་འཐས་སྣང་བ་ལ་གཟུང་འཛིན་གྱི་དངོས་པོར་ཞེན་པས་སྲིད་པ་བར་མ་དོར་རྨི་ལམ་སྒྱུ་མ་ཙམ་དུ་མ་ཤེས་པས་ཆགས་སྡང་གིས་མཚམས་སྦྱར་བ་ལས་སྲིད་པའི་ཉིང་མཚམས་སྦྱར་ཏེ། སྐྱེ་བ་ཡང་དང་ཡང་དུ་བླངས་པས་ཡང་གཟུང་འཛིན་གཉིས་འཛིན་གྱིས་གཞི་བྱས་པས་འཁོར་བར་འཁྱམས་པའོ། །ད་རེས་དེ་ལས་བཟློག་པ་བླ་མའི་གདམས་ངག་ལ་ཡིད་འཇུག་ཏུ་མ་བཏུབ་ན་ཐ་ཚིག་བསྟན་པ་ནི། དེ་ལྟར་རྨི་ལམ་དངོས་དག་ལ། །བློ་ནི་འཇུག་ཏུ་མ་བཏུབ་ན། །སྔོན་དུ་འགྲོ་བ་དག་བྱ་སྟེ། །ཞེས་པ་བླ་མ་དང་ལྷག་པའི་ལྷ་ཚོགས་ལ་མཆོད་པ་དང་བསྟོད་པ་བྱ་གསོལ་བ་གདབ། ཌཱ་ཀི་དང་ཆོས་སྐྱོང་ལ་གཏོར་མ་སྦྱིན་ཀུ་ས་ལིའི་ཚོགས་བསག་བྱ་སྦྱིན་གཏོང་
2-1-17b
བྱ། དེས་སེམས་རྣལ་དུ་ཕེབས་ནས་རྨི་ལམ་ཟིན་པ་དང་སྦྱང་བ་ལ་སོགས་འགྲུབ་པར་འགྱུར་རོ། །མ་ལོག་པ་ཡི་དུས་སུ་ཡང་། །སྣང་སྲིད་སྒྱུ་མར་ཤེས་བྱ་སྟེ། །ཞེས་པ་བགེགས་ཀྱི་བར་ཆད་འབྱུང་བ་ཡིན་པས་ཁྲོ་བོའི་སྔགས་ཀྱིས་བགེགས་བསྐྲད་བསྲུང་བའི་འཁོར་ལོ་བསྒོམ། དེ་ནས་སྔར་བཞིན་དུ་བསྒོམ་པར་བྱའོ། །དེ་ལས་ཡང་བསྐྱེད་པའི་རིམ་པའི་རྟགས་དག་དང་། །འདུ་འཛི་ཤིན་ཏུ་ཉུང་བ་དང་། །སྔར་གྱི་གོམས་པ་འཁྲིད་པ་དང་། །ཞེས་གསུངས་པས་ལྷའི་འཁོར་ལོ་བསྒོམས་པས། རྣམ་པ་གསལ་བ། ངོ་བོ་སྟོང་པ་མཚན་ཉིད་གཉིས་མེད་ཟུང་འཇུག་ཉམས་བདེ་སྟོང་དུ་བསྒོམ་པར་བྱ་ཞེས་སོ། །གནས་གཡེང་བ་ཆེ་ན་རྨི་ལམ་མི་ཟིན་པས་གཡེང་བ་སྤང་བ་དང་། སྔར་གྱི་ཆོས་གཏུམ་མོ་རྨི་ལམ་སྒྱུ་ལུས་འོད་གསལ་བསྒོམ་པ་དེ་དག་གོམས་པ་འཁྲིད་པར་བྱའོ། །མོས་པ་ཤིན་ཏུ་དྲག་པ་དང་། །འགུགས་པའི་དུས་དང་ཤེས་པའོ། །ཞེས་པས་བླ་མ་ལ་མོས་པ་ཆེ་བས་གསོལ་བ་གདབ་པ་དང་། ཡུལ་གྱི་གནད་མགྲིན་པ་དང་། དུས་ཀྱི་གནད་ཐོ་རངས་དམིགས་པའི་གནད་ཨ་དམར་པོ་ལ་ཤེས་པ་གཏད་དུ་བསྣུན་པའོ། །གསུམ་པ་སྦྱང་བ་ནི། གཉིད་མ་ལོག་པའི་དུས་སུ་ཡང་། །དྲན་པས་དེ་ཉིད་སྒྱུ་མ་རུ། །ཤེས་
2-1-18a
བྱ་བསམ་པ་སྔོན་བཏང་ལ། །ནན་ཏན་དུ་ནི་བསྒོམ་པར་བྱ། །ཞེས་གསུངས་པས་སྔོན་འགྲོ་བླ་མ་ལ་གསོལ་བ་གདབ་པ་དང་། བྱང་ཆུབ་སེམས་བསྒོམ་པ་དང་། ཡི་དམ་གྱི་ལྷའི་སྐུར་བསྒོམ་པར་བྱས་ནས། རྨི་ལམ་སྦྱང་བ་ལ་རྨི་ལམ་དག་ཏུ་གང་དང་གང་སྣང་བ་དེ་དག་ཐམས་ཅད་སྤེལ་བ་དང་། རིག་པའི་རྩལ་ཐོགས་མེད་དུ་སྦྱང་བར་བྱ་སྟེ། སྤེལ་བ་དང་སྦྱང་བ་ལ་ནན་ཏན་དུ་བྱས་པས་ཉིན་མོ་ཡང་དེ་ཁོ་ན་བཞིན་དུ་སྦྱང་བར་བྱའོ། །དེ་ལྟར་དུ་ནི་གོམས་པ་དང་། །ཕན་ཚུན་དག་ཏུ་ཕྱིན་པ་དང་། །ངལ་དུབ་དག་ནི་འོང་བ་དང་། །འགྲངས་ལྟོགས་དག་ནི་འོང་བ་དང་། །ཞེས་པ་གོང་དུ་རྨི་ལམ་སྒྱུ་མ་ལ་གོམས་པས་ལྡང་འདུག་ཐམས་ཅད་དང་། ལུས་ཀྱི་སྤྱོད་ལམ་ཐམས་ཅད་དང་། ངག་གི་བརྗོད་པ་སྣ་ཚོགས་དང་། སེམས་ཀྱི་རྟོག་པ་གང་དང་གང་འགྱུས་པ་ཐམས་ཅད་རྨི་ལམ་སྒྱུ་མ་ཙམ་དུ་བྱ་སྟེ། རྨི་ལམ་དུ་གཟུགས་དང་སྒྲའི་ཆོ་འཕྲུལ་སྣ་ཚོགས་འབྱུང་བ་ཐམས་ཅད་ཀྱང་སྒྱུ་མར་ཤེས་པར་བྱའོ། །ཆོ་འཕྲུལ་དག་ནི་སྟོན་པ་དང་། །དེ་ལ་སོགས་པའི་མཚན་མ་རྣམས། །ཞེས་སངས་རྒྱས་དང་བྱང་ཆུབ་སེམས་དཔའི་རྣམ་པར་ཐར་པ་སྣ་ཚོགས་ལ་བསླབས་པས། གཉིད་མ་ལོག་པའི་
2-1-18b
དུས་སུ་ཡང་། །གོམས་པར་བྱ་བའི་བག་ཆགས་ཀྱིས། །ཞེས་པས་ཉིན་མོའི་སྣང་བ་ལམ་དུ་ཁྱེར་བས་མཚན་མོ་གཉིད་ལོག་ཀ་མའི་དུས་ཡང་དྲན་པ་ཤེས་བཞིན་གྱིས་མཚན་མོའི་དྲན་པ་དེ་ཉིད་སྣ་ཚོགས་པ་དེ་དག་ལ་བག་མི་ཚ་བར་སྤྱད་པར་བྱ། ཞེས་ཐམས་ཅད་རྨི་ལམ་སྒྱུ་མ་ཡ་ང་མེད་པ་བག་ཚ་བ་མེད་པར་སྣང་བ་ཕྱི་རོལ་གྱི་ཡུལ་དང་བསྲེ་ཐུབ་པ་ཞིག་འོང་བའོ། །བཞི་པ་གོམས་པ་འཁྲིད་པ་ནི། དེ་ལྟར་སྒྱུ་མར་ཡང་དང་ཡང་། །ཉིན་མཚན་རྟག་ཏུ་བསམས་ནས་སུ། །ཞེས་པ་ཉིན་མོའི་སྣང་བ་ཐམས་ཅད་རྨི་ལམ་སྒྱུ་མ་ལྟ་བུ་ལ་ལོངས་སྤྱད་ནས། མཚན་མོ་ཆོས་ཐམས་ཅད་ཀྱི་རྨི་ལམ་ལྟར་ཉམས་སུ་མྱོང་བར་བྱས་ཏེ། རྨི་ལམ་སྒྱུ་མ་གཉིས་སུ་མེད་པར་ཤེས་པའི་རྟགས་དང་མཚན་མ་ནི། སྣང་བ་སྣ་ཚོགས་ཐམས་ཅད་ལ་ཡ་མི་ང་བ་དང་བག་མི་ཚ་བའི་སྤྱོད་པ་བླང་དོར་དང་བྲལ་བས་འབྱུང་བ་བཞི་ཟིལ་གྱིས་ནོན་པ་ལ་སོགས་པའི་སྤྲུལ་བསྒྱུར་ནུས་པ་ལ་སོགས་པ། དམ་དུམ་ཀམ་ཀེམ་ཙམ་འབྱུང་བར་འགྱུར་བས་ཆོས་བརྒྱད་དང་བྲལ་བའི་སྤྱོད་པས་དེ་ལྟར་གོམས་པ་བརྟན་པར་བྱ་ཞེས་སོ། །དེ་ལྟར་རྨི་ལམ་སྦྱངས་པ་དེས་གོང་དུ་འཕོ་བའི་གདམས་ངག་བརྟན་པར་བྱ་བ་ནི། དེ་ལྟར་བརྟན་པར་གྱུར་
2-1-19a
ནས་ནི། །འཕོ་བ་དག་ནི་བྱ་བར་བཤད། །ཅེས་པས་རྨི་ལམ་དྲན་པས་གཟུང་བ་དང་། སྒྱུ་མར་བྱིན་གྱིས་བརླབས་པ་དང་། སྤེལ་ཞིང་སྦྱང་བ་དང་། གོམས་པ་སྔོན་དུ་འཁྲིད་པ་ལ་སོགས་པ་སོང་བས་རྨི་ལམ་གྱི་འཕོ་བ་སྦྱངས་ཏེ། གཉིད་མ་ལོག་པའི་དུས་སུ་ཡང་། །སེམས་ནི་གང་དགར་བཏང་བར་བྱ། །ཞེས་པས་འོག་མིན་ནམ་ཨུ་རྒྱན་ནམ་ཤམྦྷ་ལའམ། པུ་ལ་ཧ་རི་ལ་སོགས་པར་འཕངས་ཏེ། ལུས་ཀྱི་མདའ་སེམས་ཀྱི་གཞུ་དང་སྦྱར་ནས་འཕངས་པས་བདེ་སྟོང་གི་ཡེ་ཤེས་སྐྱེ་བར་བྱེད་པ་སྟེ། དེར་བདག་ཉིད་དཔལ་རྡོ་རྗེ་འཆང་དུ་བསྒོམས་པ་དེས། འགྲོ་སར་སེམས་ནི་བཏང་བྱས་ནས། །ཞེས་པ་སྟེ་བདག་རང་ཅི་བདེ་བར་འཕོ་བར་བྱ་བ་ཡིན། ལོག་ཀ་མ་ཡི་དུས་སུ་ཡང་། །དེ་རིང་བག་ཆགས་དྲན་བྱ་སྟེ། །ཞེས་པས་ཉིན་མོ་སྦྱངས་པའི་དམིགས་པ་ལ་ནུབ་མོ་གསལ་བཏབ་སྟེ། དེ་ལྟར་རང་གི་རིག་པ་ཡིས། །དཔྱད་ཅིང་གང་ལྟར་བདེ་བར་འཕྲོ། །ཞེས་པའི་འཕོ་བའི་ཡུལ་དང་། འཕོ་བའི་ཐབས་དང་། འཕོ་བར་འགྱུར་བའི་གནད་གང་ཡང་རུང་བས་སྤྱད་པར་བྱ། ཞེས་པའི་དོན་དེ། འདིས་ནི་སྦྱང་བར་བྱེད་པ་རྨི་ལམ་གྱི་འཕོ་བ་ཤིན་ཏུ་གནད་ཆེའོ། །དེ་ལྟར་གོང་དུ་བསྟན་པ་
2-1-19b
དེ་རྣམས་ཀྱི་དོན་བསྡུས་པ་བསྟན་པ་ནི། འཕོ་བ་བརྟན་པར་གྱུར་ནས་ནི། །ཞེས་པ་རྨི་ལམ་དེ་ཉིད་དུ་རིག་པ་གང་འདོད་དུ་འཕོ་ནུས་པར་གྱུར་ནས་སྒྱུ་མ་སྦྱང་བའི་མཚན་ཉིད་ཀྱིས། རྨི་ལམ་རྨི་ལམ་དང་། སྒྱུ་མར་ཤེས་པས་རྩལ་སྦྱངས། དེ་དག་གིས་སྔར་གྱི་བསྐྱེད་རྫོགས་ཀྱི་གདམས་པ་གང་བསྒོམས་པའི་འཕྲོ་སྦྱངས་པ་ལ། སྔར་གྱི་གོམས་པ་འཁྲིད་པར་བྱ། ཞེས་མཉམ་རྗེས་གཉིས་ཀྱི་སྔ་མ་ཇི་ལྟ་བ་བཞིན་དུ་བསྒོམ་པར་བྱའོ། །ལོག་ཀར་ཡང་དང་ཡང་དུ་བསྒོམ། །ཞེས་པ་དྲན་པས་མཚམས་སྦྱར་བར་བྱ་བ་སྟེ། འདུན་པ་སྔོན་དུ་བཏང་ནས་བསྒོམས་པས། དེ་ལྟར་རྨི་ལམ་དུས་སུ་ཡང་། །དམ་དུམ་བག་རེ་འབྱུང་བར་འགྱུར། །ཞེས་ཏེ་ཉིན་མོ་ལམ་གང་ལ་སྦྱངས་པ་དེ་མཚན་མོའི་ཚེ་དེ་ལ་རྩལ་སྦྱང་བར་བྱ་བ་ཤིན་ཏུ་གལ་ཆེའོ། །དེ་ནས་རྨི་ལམ་སྦྱང་བ་ལ། །བཟང་ངན་གང་ཡང་མི་ལྟ་སྟེ། །ཞེས་པ་བཟང་ངན་སེམས་ཀྱི་སྣང་བ་ཙམ་ཡིན་པའི་ཕྱིར་རྟོག་པའི་དྲ་བས་མ་བཅིངས་པར་བྱའོ། །རྟགས་མ་བྱུང་བར་ཟིན་པ་ཡོད། །ཅེས་རང་གིས་མ་ཚོར་ཀྱང་བླ་མས་བསྟན་པའི་དུས་སུ་རྨི་ལམ་རང་ཟིན་ལ་སོང་བ་ཡོད། རང་གི་རིག་པས་རྟོགས་པར་བྱ། །མ་རྟོགས་པ་ན་འབད་ཅིང་རྟགས། །ཤེས་པ་སྟེ། 
2-1-20a
དྲན་པའི་སྤྱན་མས་མཚམས་སྦྱར་ནས་རིག་པ་སྲངས་སུ་ཚུད་པའི་དུས་སུ་ཉིན་མོའི་སྣང་བ་སྒྱུ་མར་འཆར་རམ་མི་འཆར་མཚན་མོའི་སྣང་བ་རྨི་ལམ་བསྲེ་ལ་སྦྱང་རྨི་ལམ་དུ་མཐར་ཕྱིན་ནམ་མ་ཕྱིན་ལྟ། རྩོལ་བ་དག་གིས་བསྐྱེད་བྱས་ལ། །ཤེས་པ་ཚར་ནི་བཅད་པར་བྱ། །ཞེས་པ་ལུས་ངག་ཡིད་གསུམ་ཐ་མལ་པའི་འཁྲུལ་པ་བླ་མའི་གདམས་པས་བརྟུལ་ཞུགས་ཅན་དུ་བྱའོ། །དེ་ལས་དུས་ཅི་ཙམ་ན་རྨི་ལམ་ཟིན་ཞེ་ན། གོང་དུ་བསྟན་པའི་གདམས་པ་ལྟར། ཡང་དང་ཡང་དུ་གོམས་པར་བྱས་པས་བླ་མའི་བྱིན་རླབས་ཀྱི་མོད་དུ་ཟིན་པ་དག་ཀྱང་ཡོད། དེ་ནས་མགྲིན་པ་ལོངས་སྤྱོད་ཀྱི་འཁོར་ལོ་ལ་སོགས་རྒྱུད་སྦྱངས་ཏེ། ཡི་གེ་ལྔ་ལ་བརྟེན་པས་ལོ་ཡིས་ཟིན་པ་དག་ཀྱང་ཡོད་དོ། །དེ་ནི་ཐ་མ་སྟེ། དེ་ཡང་རྩ་ལྟུང་ཕོག་པའམ། ཁྲིམས་ཉམས་ཤིང་སྡོམ་པ་ཞིག་པའམ། བག་ཆགས་མ་དག་པས། ལམ་མ་ཟིན་པ་དག་ཀྱང་ཡོད་དེ། དེ་ལ་ཐབས་བླ་མའི་གདམས་པ་དང་། ཚོགས་གསོག་པ། མཆོད་གཏོར་མང་དུ་བྱ། དུས་ཁྱད་པར་ཅན་ལ་ག་ཎ་ཙཀྲ་བྱ། དམ་ཚིག་དང་སྡོམ་པ་ལ་བཤགས་སྡོམ་བྱ། དེ་ནས་གདམས་པ་བསྟན་ནས་བསྒོམས་པས། དེ་ལྟར་ཡང་དང་ཡང་བསྒོམས་པས། །རྨི་ལམ་བྱིན་
2-1-20b
གྱིས་རློབས་པ་ཡིན། །ཞེས་པ་རྨི་ལམ་སྒྱུ་མར་འཆར་བའི་དོན་ཏོ། །
༄། །དོན་ཤེས་པས་འཚང་རྒྱ་བ་བར་དོ།
དེ་ཡིས་བར་དོ་རློབས་པར་འགྱུར། །ཅེས་པ་ཉིན་མོའི་འཁྲུལ་རྟོག་རྨི་ལམ་དུ་འཆར། ཤར་ཡང་རང་ཞི་ཞི་ནས་མྱུར་ལམ་དུ་སློང་པ་དེས་སྲིད་པའི་བར་མ་དོའི་ལུས་དག་པའི་སྒྱུ་ལུས་སུ་བྱིན་གྱིས་རློབས་ནས་འོང་ཞེས་རྗེ་ནཱ་རོ་ཆེན་པོ-ས-་གསུང་ངོ་། །དེ་ལ་སྐྱེ་ཤི་བར་དོར་རྣམ་པར་སྨིན་པའི་ལུས་ལ་བརྟེན་ནས་བསྐྱེད་རྫོགས་ལ་གོམས་པས་རྨི་ལམ་གྱི་བར་དོར་བག་ཆགས་ཀྱི་ལུས་ལ་བརྟེན་ནས་རྩལ་སྦྱངས་པས། སྲིད་པ་འཆི་ཁའི་དུས་སུ་གོང་མ་སྔར་གོམས་པའི་རྨི་ལམ་ལ་སྦྱངས་པ། འཆི་བ་འོད་གསལ་ངོ་ཤེས་པར་བྱ་སྟེ། འཆི་ཀའི་ཤེས་པ་གསལ་བྱ་སྟེ། །འཆི་ཀའི་རྟགས་རྣམས་ཚང་བ་དང་། །ཞེས་པ་བླ་མའི་གདམས་ངག་དང་རང་གིས་མངོན་དུ་བྱས་པའི་ལམ་དང་། ཉམས་མྱོང་གི་འཕྲོ་དང་། འོད་གསལ་ངོས་ཟིན་པའི་གདེང་དང་ལྡན་པ་དེས་ཕྱི་ནང་གསང་བའི་རྟགས་རྣམས་རྫོགས་པའི་ཚེ། སྔར་གོམས་པ་ལ་སེམས་བཞག་སྟེ། །འོད་གསལ་བར་ནི་འཇུག་པར་བྱ། །ཞེས་པས་བསམ་གཏན་གྱི་འོད་གསལ་ལ་སྦྱངས་པ་དེས་རང་བཞིན་འོད་གསལ་དང་འཕྲད་ནས། འོད་གསལ་མ་ལ་བུ་ཐིམ་སྟེ་གཅིག་ཏུ་འདྲེས་པས་སངས་རྒྱ་བར་འགྱུར་བ་ལ་ཐེ་ཚོམ་མེད་པའི་ལམ་ཡིན་ནོ། །དེ་ལ་
2-1-21a
ལམ་རིམ་གྱིས་པ་ཡིས་སྐྱེ་ཤིའི་བར་དོར་འབྱུང་བའི་ལུས་ལ་བརྟེན་ནས་སྒྱུ་ལུས་འོད་གསལ་དུ་བཅུག་ནས་དེས་སྲིད་པ་བར་མ་དོ་ལམ་དུ་བྱེད་པ་ལ་འཆི་ཀའི་དུས་སུ་འོད་གསལ་གཉིས་པོས་བསུ་སྐྱེལ་བྱས་ནས་སངས་རྒྱ་བར་འགྱུར་ལ། ལམ་ཅིག་ཅར་བའི་རྟེན་གྱི་གང་ཟག་གིས་སྒྱུ་ལུས་འོད་གསལ་རྨི་ལམ་གསུམ་དུ་བསྲེ་བའི་གནད་ཀྱིས་ཟུང་འཇུག་རྒྱུད་ལ་སྐྱེས་པས་འཆི་ཁའི་དུས་སུ། འཆི་ཁར་གཉིད་ནི་ལོབས་པ་ནི། །ཞེས་པ་གཉིད་འོད་གསལ་དུ་ཚུད་པ་མཉམ་རྗེས་མེད་པའི་རྣལ་འབྱོར་པས། ཤེས་པ་ཡུལ་ལ་འཕྲོ་ན། རླུང་སེམས་གཉིས་མེད་དུ་བསྡུ་ཞིང་འཆི་ཀར་སྙིང་ག་ཆོས་ཀྱི་འཁོར་ལོར་ཧཱུྃ་ལ་རིམ་གྱིས་འོད་གསལ་དུ་ཐིམ་ཞིང་སེམས་སྤྲོས་བྲལ་གཉུག་མའི་ངང་ལ་བཞག་པར་བྱའོ། །དེ་ལ་འཆི་ཀའི་རྐྱེན་གྱིས་བསྐུལ་བའི་དུས་སུ་ལམ་རིམ་གྱིས་པ་ཞིག་ཡིན་ན། དངོས་པོ་གང་ལའང་མ་ཞེན་ཅིང་། བླ་མ་སངས་རྒྱས་ཀྱི་འདུ་ཤེས་བསྐྱེད་ལ་འཕོ་བའི་སྦྱོར་བ་ལ་ངེས་པར་བརྩམ་པར་བྱའོ། །རིམ་གྱིས་པ་དང་ཅིག་ཆར་བ་གཉིས་ཀའི་ཐུན་མོང་གནད་ཆེ་བས་ས་ཆུ་ལ་ཐིམ་པའི་དུས་སུ་དུ་བ་ལྟ་བུ། ཆུ་མེ་ལ་ཐིམ་པའི་དུས་སུ་སྨིག་སྒྱུ་(རྒྱུ་)ལྟ་བུ། མེ་ལ་རླུང་ཐིམ་པས་མཁའ་སྣང་གི་རྟགས་སྲིན་བུ་མེ་ཁྱེར་ལྟ་བུ། རླུང་ནམ་མཁའ་ལ་ཐིམ་པས་མར་མེ་འབར་
2-1-21b
བ་ལྟ་བུ། རླུང་དང་ནམ་མཁའ་རྣམ་པར་ཤེས་པ་ལ་ཐིམ་པས། སྤྲིན་མེད་པའི་ནམ་མཁའ་རྣམ་པར་དག་པ་ལྟ་བུ། རྣམ་པར་ཤེས་པ་སྣང་བ་གསུམ་ལ་རིམ་གྱིས་ཐིམ་པས་འོད་གསལ་བ་ལ་ཐིམ་པར་འགྱུར་རོ། །དེ་ངོ་ཤེས་པར་བྱེད་པ་ལ་དྲན་པ་དག་ནི་སྔོན་བཏང་ནས། །ཞེས་པ་འཆི་ཀར་དམིགས་པའི་སེམས་རྩེ་གཅིག་ཏུ་འཇོག་ཅིང་། ཐབས་བླ་མས་བསྟན་པའི་གདམས་པ་ངོ་འཕྲོད་པས་ལམ་འོད་གསལ་དང་མ་བྲལ་ཞིང་དེའི་ངང་ལ་གནས་པ་འཆི་བ་ལ་འཆི་བ་ངོ་ཤེས་པར་བྱའོ། །དེས་ལམ་གཉིས་ཀར་ཐུན་མོང་དུ་འགྲོ་བའི་གདམས་པའོ། །ས་བོན་སྐྱེ་གནས་རིམ་ཁྱབ་པ། །གཞི་དང་ཁང་པ་ཉིད་དང་ནི། །ལས་དང་སྦྱོར་བ་རང་ནུས་ལ། །རང་གི་ངོ་བོ་ཐིག་ལེར་བཅས། །ཞེས་པའི་དོན་ལ་སློབ་དཔོན་ཙཪྻ་པས་ས་བོན་ནི་རྒྱུ་སེམས་ཅན་ཐམས་ཅད་ཀྱི་རྒྱུད་ལ་ཡོད་པའི་རིག་པ་བྱང་ཆུབ་ཀྱི་སེམས་ཀུན་ལ་ཁྱད་པར་གནས་པས་བདེ་བར་གཤེགས་པའི་སྙིང་པོ་ཅན་ཞེས་སོ། །གཞི་ནི་ཀུན་གཞི་རིག་པ་རྐྱེན་གྱིས་སྒྱུ་མ་ལྟ་བུ་སྟེ། མ་སྐྱེས་པ་སྐྱེ་བ་མེད་རྟེན་འབྲེལ་ལས་སྐྱེས་པའི་དོན་མཚོན་པའོ། །ཁང་པ་ནི་བར་དོའི་ལུས་ལེན་པོའི་གནས་མའི་མངལ་ཆོས་ཀྱི་འབྱུང་གནས་གྲུ་གསུམ་པར་མཚོན་པ་ནི། སྤང་བྱ་སྟེ་གཞན་ཡང་བརྟེན་པར་འགྱུར་བའོ། །ལས་དང་སྦྱོར་
2-1-22a
བ་ནི། གནས་དེ་ལས་ལུས་བྱུང་ནས་ལས་དགེ་མི་དགེ་དང་། དེ་དག་གིས་མཚམས་སྦྱོར་བར་བྱེད་པས་རྟེན་འབྲེལ་ལས་འཆར་བས་ན་རང་ལུས་ཤེས་སོ། །དེ་ཡང་རང་གི་བག་ཆགས་ས་བོན་དང་བཅས་པ་ལ། རང་གི་ངོ་བོ་ཐིག་ལེར་བཅས་ཞེས་པ་བར་དོའི་ཤེས་པ་ཡི་གེ་ཨ་ཕྱེད་པའི་ཚུལ་དང་། ཕ་དང་མའི་ས་བོན་གསུམ་གཅིག་ཏུ་འདྲེས་པའི་བར་དུ་རྣམ་པར་ཤེས་པ་ཞུགས་པ་ནི། ས་བོན་གྱི་ངོ་བོ་ཐིག་ལེར་གྱུར་པ་ལ་རིག་པ་འཇུག་པ་ལ་དགོངས་པའོ། །སློབ་དཔོན་ཀླུ་སྒྲུབ་ནི་དེ་ལྟར་དུ་ཡང་རུང་སྟེ་འདིར་ས་བོན་སྐྱེས་ནས་རིམ་ཁྱབ་ནི། ལས་ཐམས་ཅད་རླུང་གི་བྱེད་པས་ན་ཁྱབ་བྱེད་ཀྱི་རླུང་གིས་ངོ་བོ་ལ་རྣམ་པར་ཤེས་པ་རྟེན་བཅས་པས་བཞོན་པ་ལྟ་བུས་བྱ་སྟེ། ལུགས་ཟློག་གི་སྣང་བ་གསུམ་ལས་བསྐྱེད་པ་དེ་བར་མ་དོའི་སྲིད་པ་ལ་སེམས་ཁྱབ་ནས་གནས་པ་སྟེ། གཞི་ནི་བར་དོ་ཡིད་ཀྱི་ལུས་གཞི་ལ་ཁང་པ་ནི་མའི་མངལ་ལམ་རྫུས་སྐྱེས་པདྨ་ལྟ་བུ་སྟེ་རང་དབང་མེད་པར་ལུས་པའོ། །[རྫི་ཆར་དྲག་པོ་སེར་བ་དྲག་པོ་ལྟ་བུས་ནོག་པའི་བྲོ་བའི་སྐྱབས་བཙལ་བས་ལུས་པའོ། །[རྫི་ཆར་དྲག་པོ་སེར་བ་དྲག་པོ་ལྟ་བུས་ནོག་པའི་བྲོ་བའི་སྐྱབས་བཙལ་བས་ལུས་པའོ། །]]ལས་དང་སྦྱོར་བ་རང་ནུས་ནི། རླུང་ལྔ་ལ་འོད་ཁ་དོག་ལྔའི་སྣང་བ་ཤར་ནས་གཟུང་འཛིན་གཉིས་སུ་འཁྲུལ་ཏེ། ལས་གང་དང་གང་རིགས་དྲུག་ལ་འཕེན་པ་གར་ཡོད་དུ་སྐྱེ་བ་
2-1-22b
སྟེ། འོད་ལྔ་ཡེ་ཤེས་ཤེས་ན་དག་པའི་སྒྱུ་ལུས་ཐོབ་ནས་སངས་རྒྱ་ལ། དེའི་འོད་གང་རུང་གཅིག་ལ་ཞེན་ན་དེའི་བར་དུ་འཐུམས་ཏེ་རླུང་གིས་སེམས་དབང་བྱས་ནས་རང་གི་ངོ་བོ་ཐིག་ལེ་དཀར་དམར་གྱི་བར་ནས་རྟེན་བཅས་ནས་སྲེད་པའི་ཉིང་མཚམས་སྦྱོར་རོ། །སློབ་དཔོན་ལྭ་བ་པ་ནི། རྣལ་འབྱོར་པས་བསྒོམ་པའི་དུས་ཉིད་ཡིན་ཏེ། རྣལ་འབྱོར་བ་དང་སྤྱིར་ཐམས་ཅད་ལ་གནས་པ་སྟེ། ལུས་ཐམས་ཅད་རྩ་ལ་བརྟེན། རྩ་ཐམས་ཅད་ལ་རླུང་བརྟེན། རླུང་ཐམས་ཅད་ལ་ཐིག་ལེ་བརྟེན། རྩ་ཀུན་འདར་མའི་ནང་ན་རླུང་སེམས་འདྲེས་པའི་ཐིག་ལེ་འོད་ཁ་དོག་ལྔ་དང་བཅས་པ་གཅིག་གནས་པ་སྟེ། དེས་ཀུན་ཁྱབ་པས། ས་བོན་སྐྱེ་གནས་རིམ་ཁྱབ་བོ། །གཞི་ནི་ལུས་དངོས་པོའི་གནས་ལུགས་ལ་བརྟེན་ནས་རྩ་དང་རླུང་དང་བྱང་སེམས་ལ་བརྟེན་པ་སེམས་ཀྱི་རྒྱལ་པོ་གནས་པ་སྟེ། རྒྱལ་པོ་དང་བློན་པོ་དང་ཕོ་བྲང་ལྟ་བུའོ། །ལས་དང་སྤྱོད་པ་རང་ནུས་ནི། ལུས་ཀྱི་གནས་ན་འབྱུང་བ་བཞིའི་རླུང་བཅུར་གནས་པ་དང་ཉེ་རླུང་རིགས་གཉིས་ཀྱིས་འཁོར་འདས་ཀྱི་ལས་སྣ་ཚོགས་བྱེད་པ་རྩ་རླུང་ཐིག་ལེའི་རྣལ་འབྱོར་ཡིན་ནོ། །རང་གི་ངོ་བོ་རླུང་འདྲེས་པའི་ཐིག་ལེ་དེ་གཉིད་དང་རྨི་ལམ་དང་སྙོམས་འཇུག་དང་ཐ་མལ་པའི་དུས་སུ་རྩ་འཁོར་ལོ་བཞིར་འཕོ་བ་ཡིན་
2-1-23a
ནོ་ཞེས་གསུངས་སོ། །སུ་བྷ་གི་སྐལ་བ་བཟང་མོ་ནི། འདི་གཞན་ལུས་ལ་བརྟེན་པའི་སྐབས་ཡིན་ཏེ། ས་བོན་སྐྱེ་གནས་རིམ་ཁྱབ་ནི། ལུས་ཐམས་ཅད་ལ་ཀུན་རྫོབ་བྱང་ཆུབ་ཀྱི་སེམས་ཁྱབ་པར་ཏིལ་དང་ཏིལ་གྱི་མར་ཁུ་ལྟ་བུ་ལ། གཞི་ནི་རྣལ་འབྱོར་པའི་ལུས་ལ། ཁང་པ་ནི་ཤེས་རབ་ཀྱི་བྷ་ག་སྟེ་དེ་གཉིས་སྙོམ་པར་ཞུགས་པའི་སྦྱོར་བ་འདུ་ཤེས་གསུམ་ལྡན་དུ་བྱས་པས། ལས་དང་སྤྱོད་པ་རང་ནུས་ནི་བསྲུབ་པ་དང་བསྲུབ་པའི་སྦྱོར་བས་བྱང་སེམས་རྩའི་གཙོ་བོ་སུམ་ཅུ་རྩ་གཉིས་ལས་བབ་སྟེ། དབུ་མར་འདུས་ནས་དགའ་བ་བཞིའི་ཡེ་ཤེས་རྟོགས་པར་བྱེད་པས་རང་ནུས་ཞེས་བྱ། དེ་ཡང་རང་གི་ངོ་བོ་ཐིག་ལེར་བཅས་ནི་བཟུང་བ་དང་བཀྲམ་པ་ལ་སོགས་པ་བྱས་པས་ཐིག་ལེ་ལ་དབང་ཐོབ་ནས། ཐབས་ཤེས་རབ་བདེ་བའི་ཐིག་ལེ་སྤྱི་བོར་བསྐྱེལ་ནས་གནས་ཤེས་པའི་དོན་ནོ། །སློབ་དཔོན་མ་ཏང་ཀི་ནི་འཕོ་བའི་སྦྱོར་བ་ལ་བཞེད་དེ། ས་བོན་སྐྱེ་གནས་རིམ་ཁྱབ་ནི་སྙིང་གའི་ཡི་གེ་ཧཱུཾ་ཀུན་དར་མའི་ནང་ན་གནས་པ་སྟེ། དེ་རྣམ་པར་ཤེས་པའི་ས་བོན་ཡིན་ཏེ། ལུས་ཅན་ཀུན་ལ་ཁྱབ་བོ། །གཞི་ནི་ལུས་དངོས་པོའི་གནས་ལུགས་ཀྱི་རྩ་ཀུན་དྷར་མ་རྟེན་དང་བརྟེན་པར་བཅས་པ་ཡིན་ལ། ཁང་པ་ནི་མདུན་གྱི་ནམ་
2-1-23b
མཁའ་ལ་སྤྱན་དྲངས་པའི་ཡི་དམ་འཕོ་བའི་ཡུལ་དེ་ཡིན་ཏེ། ལས་དང་སྤྱོད་པ་རང་ནུས་ཏེ་ལྟེ་བ་ནས་སྤྱི་བོ་དེ་ནས་ཡི་དམ་གྱི་ཐུགས་ཀར་རླུང་དང་རྣམ་པར་ཤེས་པ་དྲིལ་ནས། རང་ལུས་དང་བྲལ་བར་ནུས་ཤིང་གཞན་ལུས་ལྷ་ལ་འཕོ་བར་ནུས་པའོ། །རང་གི་ངོ་བོ་ནི་རླུང་འདྲེས་པའི་ཐིག་ལེ་ས་བོན་དང་བཅས་པ་ཡི་དམ་གྱི་ཐུགས་ཀར་འཕོ་བ་ལ་བྱའོ། །དེ་ལ་རྗེ་བཙུན་ཏེ་ལོ་པ་ནི་དེ་དག་ཐམས་ཅད་ཐད་ཀ་སོ་སོ་ལ་དགོངས་པར་གསུངས་ཏེ། དང་པོ་ཙཪྻ་པ་ནི་ཆོས་སྤྱི་ལ་དགོངས་པ་ཡིན། སློབ་དཔོན་འཕགས་པ་ནི་ལས་ཐམས་ཅད་རླུང་གི་བྱེད་པས་བར་དོ་ལ་དགོངས་པ་ཡིན། ཌཱ་ཀི་མ་ནི་གཞན་ལུས་ཤེས་རབ་ལམ་དུ་བྱེད་པ་ལ་དགོངས་པ་ཡིན། མ་ཏང་ཀི་པས་ནི་སྲིད་པ་འཆི་ཁར་འཕོ་བ་བྱ་བ་དེ་ལ་དགོངས་པས་སོ། །དེ་ཐམས་ཅད་སོ་སོར་བདེན་གསུང་སྐད་དོ། །རྗེ་ནཱ་རོ་པ་ནི་ལམ་གོང་དུ་གསུངས་པའི་རིམ་གྱིས་པ་དང་། ཅིག་ཅར་བ་གཉིས་ལས། བསྐྱེད་རྫོགས་ཟུང་འབྲེལ་དུ་ཉམས་སུ་བླངས་པས་ལམ་བསྲེ་བ་གསུམ་དང་སྦྱར་ན། འདོད་ཆགས་ཅན་ལ་སྐྱེ་ཤིའི་བར་དོ་ལམ་དུ་སློང་བ་དགའ་བ་བཞིའི་གནད། ཞེ་སྡང་ཅན་ལ་སྲིད་པ་བར་དོ་སྒྱུ་ལུས་ལམ་དུ་སློང་བ་དང་། གཏི་མུག་ཅན་ལ་རྨི་ལམ་གྱི་བར་དོ་
2-1-24a
གཉིད་འོད་གསལ་དུ་འཇུག་པ་སྟེ་དེ་དག་ལ་ཡང་ཁྱབ་ལ། གོང་མ་དེ་དག་ཐམས་ཅད་ཀྱང་རྟེན་གྱི་གང་ཟག་གཅིག་གིས་ཉམས་སུ་བླང་བྱ་དང་རྟོགས་བྱར་འདུས་ཏེ། རྒྱུ་སེམས་ཅན་སྲིད་པའི་བར་དོ་དང་དངོས་པོའི་ངོས་བཟུང་། ལམ་རྣལ་འབྱོར་ལ་བསྒོམ་བྱ་ལམ་དུ་འཁྱེར་བ། འབྲས་བུ་དག་པ་ཡེ་ཤེས་ཀྱི་སྐུ་རྟོགས་པའི་ཐབས་མཚོན་པ་དང་གསུམ་དུ་འདུས་པའོ་གསུང་ངོ་། །ལམ་རིམ་གྱིས་-པ་-དང་། ཅིག་ཅར་བ་གཉིས་ཀའི་ཐུན་མོང་དུ་བསྟན་པའི་ངོ་བོ་ནི། ལམ་བགྲོད་པ་གཅིག་པར་བསྟན་ཏེ། བཅུ་གཉིས་མཐའ་ཚིག་-དག་-གི་དོན། །གང་གིས་རྟག་ཏུ་གོམས་གྱུར་ན། །དེས་ནི་དངོས་གྲུབ་བདེ་བ་ཡི། །རྡོ་རྗེ་འཛིན་པར་རང་ཉིད་འགྱུར། །ཞེས་པའི་དོན་འདི་ལ། རྗེ་ནཱ་རོ་པ་ཉིད་ཀྱིས་གསུངས་པ་ནི། བར་དོ་གསུམ་ལ་རིམ་གྱིས་པ་དང་ཅིག་ཅར་དུ་བགྲོད་པ་ལས་འཆི་བ་དོན་དམ་པའི་བདེན་པ་ལམ་དུ་འཆར་བ་ནི། བར་དོ་དང་པོ་སེམས་སྣང་བ་གསུམ་གྱི་སྒོ་ནས་འོད་གསལ་ལ་ཆོས་ཀྱི་སྐུ་ངོས་གཟུང་བ་ནི། དང་པོ་འབྱུང་བ་བཞི་ཐིམ་པའི་དུས་སུ། ས་ཆུ་ལ་ཐིམ། ཆུ་མེ་ལ་ཐིམ། མེ་རླུང་ལ་ཐིམ། རླུང་རྣམ་པར་ཤེས་པ་ལ་ཐིམ་པས་དེ་ལ་འབྱུང་བ་བཞི་ཐིམ། དབང་པོ་ལྔའི་ཡུལ་ལྔ་ཐིམ་པ་ལ། མིག་གིས་གཟུགས་མི་གསལ་ཞིང་རྣ་བ་
2-1-24b
སྒྲ་ལ་ཐིམ་རྣ་བས་སྒྲ་མི་ཐོས་ཤིང་སྣ་དྲི་ལ་ཐིམ། སྣས་དྲི་མི་ཚོར་ཞིང་ལྕེ་ཡུལ་རོ་ལ་ཐིམ། རོ་མི་མྱོང་ཞིང་ལུས་ཡུལ་རེག་ལ་ཐིམ། རེག་བྱ་མི་ཚོར་ཞིང་ཡིད་ཀྱང་རྣམ་པར་ཤེས་པ་ལ་ཐིམ་པས་ན་ཡུལ་ལྔ་ལ་ཐིམ་པ་སྟེ་དགུ། དེ་ནས་སྣང་བ་གསུམ་ལ་རྣམ་པར་ཤེས་པ་སྣང་བ་ལ་ཐིམ་པའི་དུས་སུ་ཕྱི་རྟགས་ཟླ་བ་ཤར་བ་ལྟ་བུ། ནང་རྟགས་དུ་བ་ལྟ་བུ་འབྱུང་། སྣང་བ་མཆེད་པ་ལ་ཐིམ་པའི་དུས་སུ་ཕྱི་རྟགས་ཉི་མ་ཤར་བ་ལྟ་བུ། ནང་རྟགས་ཤེས་པ་མེ་ཁྱེར་ལྟ་བུ་འབྱུང་། མཆེད་པ་ཐོབ་པ་ལ་ཐིམ་པའི་དུས་སུ་ཕྱི་རྟགས་མུན་པ་ལྟ་བུ། ཤེས་པ་མར་མེ་ལྟ་བུ་འབྱུང་། དེ་ལྟར་སྣང་བ་གསུམ་ཐིམ་པ་སྟེ་བཅུ་གཉིས་ཐིམ་པའི་རྗེས་ལ། ཐོབ་པ་འོད་གསལ་ལ་ཐིམ་ཙ་ན། རྟགས་ཐོ་རངས་ཀྱི་སྐྱ་རེངས་ཤར་བ་ལྟར་གསལ་ཞིང་སྟོང་པ་འབྱུང་། ཤེས་པ་ནམ་མཁའ་སྤྲིན་དང་བྲལ་བ་སྟོན་ཀའི་ནམ་མཁའ་ལྟར་དྲི་མ་མེད་པ་སྟེ། མི་རྟོག་པ་བློ་ལས་འདས་པ་འཆར་བའོ། །དེ་ལྟར་འབྱུང་བ་བཞི་ཐིམ་པ་དང་། ཡུལ་ལྔ་ཐིམ་སྣང་བ་གསུམ་ཐིམ་པས་ན། བཅུ་གཉིས་མཐའ་ཚིག་དག་གི་དོན་ཤེས་བཤད་དོ། །གང་གིས་རྟག་ཏུ་གོམས་གྱུར་ན། །ཞེས་པ་དེ་ལྟ་བུའི་དུས་ད་ལྟའི་བསམ་གཏན་གྱི་འོད་གསལ་དང་། རང་བཞིན་གྱི་འོད་གསལ་གཉིས་
2-1-25a
པོ་མ་པང་དུ་བུ་རྒྱུག་པ་ལྟར་འོད་གསལ་མ་བུ་ཕྲད་(འཕྲད་)པའི་དོན་དེ་ལ་གནས་ན། རྟོག་བཅས་རང་བཞིན་བརྒྱད་ཅུ་ཐིམ་ནས། རྟོག་བཅས་ཡོངས་སུ་དག་པའི་དོན་རྟོག་མེད་འོད་གསལ་སྤྲོས་མེད་ཆོས་ཀྱི་སྐུ་མངོན་དུ་གྱུར་པར་བརྟན་པ་ནི་སྤྲོས་པ་མེད་པའོ། །དེ་ནི་དངོས་གྲུབ་བདེ་བ་ཡི། །ཞེས་པ་ནི་དེ་ནས་འོད་གསལ་གྱི་མེས་བག་ཆགས་ཐམས་ཅད་སྦྱོང་བའི་དུས་སུ། རིལ་འཛིན་དང་རྗེས་ཞིག་གིས་སྒྱུ་མ་ལྟ་བུའི་སྐུ་དེ་ཡེ་ཤེས་ཀྱི་སྐུར་བསྒྱུར། མཉམ་རྗེས་གཉིས་སུ་མེད་པར་སྦྱོང་བ་སློབ་པའི་ཟུང་འཇུག་ཅེས་བྱ། དེ་ནས་ཟུང་འཇུག་གི་སྐུ་ཐོབ་ནས་རྣམ་པ་གཟུགས་སྐུ་ལ་ངོ་བོ་ཆོས་སྐུར་གནས་པའི་དུས་སུ། སྐུ་གཅིག་གིས་ཞིང་ཁམས་ཐམས་ཅད་ལ་ཁྱབ་པ་དང་། གསུང་ཅིག་གདུལ་བྱ་སོ་སོར་གོ་བ་དང་། ཐུགས་ཏིང་འཛིན་གཅིག་ལས་མ་གཡོས་པར། ཏིང་འཛིན་གྱི་སྒོ་བསམ་གྱིས་མི་ཁྱབ་པ་ལ་འཇུག་ཅིང་སྤྲོ་བསྡུ་བྱེད་པ་སྟེ། ཐམས་ཅད་མཁྱེན་པར་གྱུར་པ་སྟེ། ས་དང་པོ་ནས་བཅུའི་བར་དུ་རིམ་གྱིས་བགྲོད་ནས། བཅུ་གཅིག་པ་ཀུན་ཏུ་འོད་ནས་བཅུ་གཉིས་པ་ཡེ་ཤེས་ཆེན་པོ་ལ་སློབ་པ་དང་མི་སློབ་པའི་སྐུར་ཟུང་འཇུག་གིས་བགྲོད་དེ། རྣལ་འབྱོར་ཆེན་པོ་གཉིས་སུ་མེད་པ་རྣམ་པར་རྒྱལ་བའི་རྒྱུད་ལས། བསྐྱེད་པའི་རིམ་ལ་གནས་ཡེ་ཤེས། །
2-1-25b
རབ་ཏུ་དགའ་བ་ནས་བརྩམ་སྟེ། །མངོན་དུ་འགྱུར་བའི་བར་དུ་སྒྲོད་(བགྲོད)། །རིང་དུ་སོང་བ་དྲུག་པ་ནས། །མི་གཡོ་བ་ཡི་བར་དག་ཏུ། །སྦྱོར་བ་གསུམ་གྱིས་ངེས་པར་སྦྱང་། །ལམ་ལ་སྦྱོར་བས་ས་བརྒྱད་པའོ། །སྣང་བ་གསུམ་ལ་ཞུགས་པ་དག །ས་བཅུ་ལ་ནི་ངེས་གནས་པ། །རང་བཞིན་བརྒྱ་དང་དྲུག་བཅུ་(ཅུ་)པོ། །འོད་གསལ་བ་ལ་ཐིམ་འགྱུར་པས། །སྦྱང་བྱ་སྦྱོང་བྱེད་གཉིས་ལས་ནི། །སློབ་དང་མི་སློབ་རྣམ་གཉིས་ཀྱིས། །བཅུ་གཅིག་བཅུ་གཉིས་བདེ་གཤེགས་ས། །དེར་གནས་བདེ་བ་ཆེན་པོ་ཡི། །བཅུ་གསུམ་རྡོ་རྗེ་འཛིན་ལ་གནས། །ཤེས་གསུངས་པས་ས་བཅུ་གཉིས་བགྲོད་ནས་བཅུ་གསུམ་པ་རྡོ་རྗེ་འཛིན་པའི་ས་ལ་གནས་པས་ན། རྡོ་རྗེ་འཛིན་པར་རང་ཉིད་འགྱུར། །ཞེས་གསུངས་པ་སྟེ། དབང་པོ་ཡང་རབ་ཀྱིས་སྒྱུ་ལུས་འོད་གསལ་གྱི་མེས་སྦྱངས། དེ་ལས་ཟུང་དུ་འཇུག་པ་བཅུ་གསུམ་རྡོ་རྗེ་འཛིན་པའི་ས་མངོན་དུ་བྱེད་པའོ། །དབང་པོ་རབ་ཀྱིས་བྱང་ཆུབ་སེམས་དཔའ་ཆེན་པོ་རྣམས་དང་མཐུན་པར་ས་བཅུ་གཅིག་པ་ལ་གནས་ཤིང་དེའི་ངང་ལས་ཏིང་ངེ་འཛིན་གྱི་རྩལ་སྦྱངས་པས་ཐམས་ཅད་མཁྱེན་པར་འགྱུར་བ་དང་། འབྲིང་གིས་ལམ་རིམ་པ་ནས་རིམ་པར་བགྲོད་དེ་རིག་པ་འཛིན་པ་མཁའ་སྤྱོད་དུ་ལུས་སེམས་ཆོས་སྐུར་གནས་པ་དང་། ཐ་མ་ལུས་ཀྱི་རྩོལ་
2-1-26a
བ་དང་ལྟ་བའི་གདེང་གིས་གར་འདོད་པའི་སར་འཕོས་པས་འོད་གསལ་དེ་ཉིད་རྟོགས་པའི་རྒྱུར་གྱུར་ནས་འཚང་རྒྱ་བར་འགྱུར་རོ། །དོན་འདི་ལ་བླ་མ་ཀ་སོ་རི་པའི་ཞལ་ནས་ཚེ་འདི་ཉིད་དུ་ཅིག་ཆར་དུ་འཇུག་པ་འོད་གསལ་རྒྱུད་ལ་ཤར་ནས་སངས་རྒྱ་བ་ལ། རྟགས་ལྔ་དང་ཕན་ཡོན་བརྒྱད་མངོན་དུ་གྱུར་དགོས་ཏེ། ས་ཆུ་ལ་ཐིམ་པའི་རྟགས་དུ་བ་ལྟ་བུ། ཆུ་མེ་ལ་ཐིམ་པའི་རྟགས་སྨིག་སྒྱུ་(རྒྱུ་)ལྟ་བུ། མེ་རླུང་ལ་ཐིམ་པའི་རྟགས་སྲིན་བུ་མེ་ཁྱེར་ལྟ་བུ། རླུང་ནམ་མཁའ་ལ་ཐིམ་པའི་དུས་སུ་སྤྲིན་མེད་པའི་ནམ་མཁའ་ལྟ་བུ་འཆར་ཏེ། བསྐྱེད་རྫོགས་ཟུང་འཇུག་ཏུ་སྒོམ་པ་ལ་བརྟེན་པའི་ཞི་གནས་ཀྱི་དུས་སུ། ས་ཆུ་མེ་རླུང་བཞི་མངོན་དུ་གྱུར་པ་སྟེ། འབྱུང་བ་བཞི་ཨ་བ་དྷཱུ་ཏིར་དབང་འདུས་པའི་རྟེན་འབྲེལ་དུ་ཤེས་པར་བྱའོ། །ནམ་མཁའ་ལྟ་བུ་ནི་ལྷག་མཐོང་རྟོགས་པའི་རྟགས་སོ། །ཡོན་ཏན་བརྒྱད་འཆར་བ་ནི། སའི་ཡོན་ཏན་ལུས་མངའ་ཆེ་བ་དང་། ཆུའི་ཡོན་ཏན་ལུས་སྣུམ་པ། མེས་བཀྲག་མདངས་ཆེ་བ། རླུང་གིས་ལུས་ཡང་བ། ཟླ་བའི་གྲིབ་མ་གཞན་གྱིས་མི་མཐོང་། ཉི་མའི་གཟུགས་མི་སྣང་། ནམ་མཁའི་ཡོན་ཏན་སྟོན་ཁའི་དུས་ཀྱི་ནམ་མཁའ་ལྟ་བུར་ཉིན་མཚན་མིག་ཕྱེ་བཙུམས་མེད་པར་འབྱུང་བའོ། །དེ་ལྟར་ཡོན་ཏན་བཅུ་གཉིས་
2-1-26b
པོ་དེ་དག་མངོན་དུ་གྱུར་པས་འོད་གསལ་རྟོགས་པས་ན། བཅུ་གཉིས་མཐའ་ཚིག་དག་གི་དོན། །ཞེས་པ་སྟེ་ཐ་མ་ཐམས་ཅད་ཀུན་སོན་པའི་ཡོན་ཏན་བདེ་བ་སྤྲོས་བྲལ་ལྷན་ཅིག་སྐྱེས་པའི་ཡེ་ཤེས་ནང་ནས་ཤར་བས་འོད་གསལ་ལ་རྒྱུན་ཆད་མེད་པར་འབྱུང་བ་སྟེ། དེ་རྟེན་གྱི་གང་ཟག་གང་གིས་རྟག་ཏུ་མཉམ་རྗེས་མེད་པར་གོམས་པར་བྱས་ནས། དེ་ནི་དངོས་གྲུབ་བདེ་བ་ཡི། །ཞེས་ཕྱག་རྒྱ་ཆེན་པོ་མཆོག་གི་དངོས་གྲུབ་ཚེ་འདིར་ཐོབ་སྟེ། རྡོ་རྗེ་འཛིན་པར་རང་ཉིད་འགྱུར། །ཞེས་བཅུ་གསུམ་རྡོ་རྗེ་འཛིན་པའི་ས་ལ་གནས་པའི་དོན་ཏོ། །དོན་འདི་ལ་བླ་མ་རི་རི་ཛྙཱ་ན་གརྦྷའི་ཞལ་ནས། ཐབས་ལམ་ལ་རིམ་གྱིས་པ་དང་། ཅིག་ཅར་བ་གང་གི་སྒོ་ནས་བསྒོམས་ཀྱང་མངོན་དུ་གྱུར་པའི་དུས་སྐུའི་སྒོ་དགུ་དགག །གསུང་གི་སྒོ་བཞི་དགག །ཐུགས་ཀྱི་སྒོ་གཉིས་དབྱེ་གསུངས་ཏེ། དེ་ལ་སྐུའི་སྒོ་དགུ་ནི་བུ་ག་དགུའི་རླུང་ཡིན་ལ། དེ་ཡང་བསྡུ་ན་དབང་པོ་སྒོ་ལྔའི་རླུང་དང་། ཡིད་ཀྱི་རྣམ་པར་ཤེས་པའི་རླུང་དང་དྲུག་ཏུ་བསྡུ། དེའི་ཐོག་ཏུ་གསུང་གི་སྒོ་བཞི་འགག་པ་ནི་སྣ་བུག་གཉིས་ནས་འབྱུང་བ་བཞིའི་རླུང་ལ། གཡས་དང་གཡོན་དང་གཉིས་ཀ་ནས། །དལ་བར་རྒྱུ་དང་རྣམ་བཞིར་རྒྱུ། །ཞེས་པ་སྟེ་འཇུག་རྒྱུན་ཆད་པ་དང་། ཐུགས་ཀྱི་སྒོ་གཉིས་བྱེ་བ་ནི། སྙིང་མ་རིག་པའི་
2-1-27a
རྩ་བ་བྱེ་བ་དང་། སྨིན་མཚམས་ཀྱི་མཛོད་སྤུའི་ཡེ་ཤེས་ཀྱི་མཐོངས་བྱེ་བ་སྟེ། གསུང་གི་སྒོ་བཞི་འགགས་ནས། ཐུགས་ཀྱི་སྒོ་གཉིས་བྱེ་བ་སྟེ་དྲུག་དེ་ལྟར་བཅུ་གཉིས་པོ་ལ། བཅུ་གཉིས་མཐའ་ཚིག་དག་གི་དོན་ཞེས་པ་ལ་སོགས་པ་ཚེ་འདིར་མཆོག་ཐོབ་པའི་དབང་དུ་བྱས་པའོ། །བླ་མ་པེཎ་ཌ་པ་ནི། འདི་ནི་རྫོགས་པའི་རིམ་པ་རྩ་རླུང་བྱང་ཆུབ་ཀྱི་སེམས་གསུམ་ལ། རྩའི་དབང་དུ་བྱས་ན་རྡོ་རྗེའི་ལུས་འདི་ལ་གནས་དང་ཉེ་བའི་གནས་དང་། ཞིང་དང་ཉེ་བའི་ཞིང་དང་། ཚནྡོ་དང་ཉེ་བའི་ཚནྡོ་དང་། འདུ་བ་དང་ཉེ་བའི་འདུ་བ་དང་། འཐུང་གཅོད་དང་ཉེ་བའི་འཐུང་གཅོད་དང་། དུར་ཁྲོད་དང་ཉེ་བའི་དུར་ཁྲོད་དེ་ལུས་ཀྱི་གནས་ཆེན་པོ་རྣམས་སུ་རྩའི་མདུད་པར་གཏུམ་མོ་ཡེ་ཤེས་ཀྱི་མེ་འབར་བས་ཐིག་ལེ་ཁ་འབུས་པས་རྩ་མདུད་གྲོལ་བས་རིམ་པས་ས་བཅུ་གཉིས་བགྲོད་པའི་དོན་དང་། རླུང་གི་དབང་དུ་བྱས་པས། རྩ་བའི་རླུང་ལྔ་དང་ཡན་ལག་གི་རླུང་ལྔ་དེའི་ཐོག་ཏུ་སྲོག་རྩོལ་གྱི་རླུང་གཉིས་བཅུ་གཉིས་པོ་དེ་ཀུན་དྷ་མར་ཐིམ་པས་མི་རྟོག་པའི་ཡེ་ཤེས་འཆར་བའི་དོན་དང་། བྱང་ཆུབ་སེམས་ཀྱི་དབང་དུ་བྱས་པས་ལྟེ་བར་སྐུའི་རྟེན་བྱེད་པའི་ཐིག་ལེ་གསུམ་དང་། སྙིང་ག་ན་ཐུགས་ཀྱི་རྟེན་བྱེད་པའི་ཐིག་ལེ་གསུམ་དང་། མགྲིན་པར་
2-1-27b
གསུང་གི་རྟེན་བྱེད་པའི་ཐིག་ལེ་གསུམ་དང་། སྤྱི་བོ་བདེ་བ་ཆེན་པོའི་རྟེན་བྱེད་པའི་ཐིག་ལེ་གསུམ་སྟེ་བཅུ་གཉིས་པོ་དེ་ལས་བདེ་བ་དོན་དམ་པ་བསྐྱེད་པར་བྱེད་པ་སྟེ། རྩ་སྐུ་རྡོ་རྗེ་སྐྱེ་མེད་དུ་དག །རླུང་གསུང་རྡོ་རྗེ་བརྗོད་མེད་དུ་དག །ཐིག་ལེ་གསུམ་ཐུགས་རྡོ་རྗེ་རྟོག་མེད་དུ་རྟོགས་དེ་ལྟར་རྡོ་རྗེ་གསུམ་པོ་རོ་གཅིག་པ་ཟུང་འཇུག་ཆེན་པོ་ཡེ་ཤེས་ཀྱི་རྡོ་རྗེ་དག་པས་ན། རྡོ་རྗེ་འཛིན་པར་རང་ཉིད་འགྱུར། །ཞེས་པའི་དོན་ཏོ། །ཀ་ན་ཀ་ཤྲི་ནི་འདི་རྗེ་ནཱ་རོ་པ་ཉིད་ཀྱི་དཀའ་བ་བཅུ་གཉིས་རྫོགས་པའི་ཐ་མར་བཀའ་དཔེ་རྩ་བའི་སྡོམ་པ་འདི་གནང་བས་དེ་ཉིད་ལ་ཟེར་གསུང་བར་གདའ་འོ། །རྟེན་འབྲེལ་བཅུ་གཉིས་སུ་རྟོགས་པ་ཡང་འབྱུང་སྟེ་ཕྱོགས་ཙམ་ཞིག་ཡིན་ནའང་མ་རིག་པ་ནས་རྒ་ཤིའི་བར་དུ་འགགས་ཏེ། སེམས་སུ་ཐིམ་པར་འདོད་པ་པྲཛྙཱ་རཀྵི་ཏས་བཞེད་དོ། །དེ་ལ་བར་དོ་དང་སེམས་སྣང་བ་གསུམ་གྱི་སྒོ་ནས་འོད་གསལ་ཆོས་ཀྱི་སྐུ་ངོས་གཟུང་བ་འབྲས་བུ་ཐོབ་པར་བསྟན་ནས། དེ་ལས་བར་དོ་གཉིས་པ་དག་པ་དང་མ་དག་པའི་སྒྱུ་ལུས་ངོས་གཟུང་ནས་སྲིད་པ་བར་མ་དོར་སངས་རྒྱས་པའི་ཚུལ་ནི། ཟུང་འཇུག་གི་ཡེ་ཤེས་མངོན་དུ་མ་གྱུར་ན། འོད་གསལ་དེའི་ངང་ལས་རྣམ་པར་རྟོག་པ་སྐད་ཅིག་མ་གཅིག་སྐྱེ་བ་དང་། ཞག་ཕྱེད་དང་བཞི་ཕན་ཆད་སྔ་མའི་ལུས་
2-1-28a
སུ་སྣང་སྟེ། སྐྱེ་བ་སྔ་མའི་ལུས་བོར་ཡང་ཤི་ནས་ཀྱང་ཤི་བར་མ་ཤེས་པས་ན་ལུས་ཀྱང་ཆུ་ལས་ཉ་འཕར་བ་བཞིན་དུ་སྣང་བ་ནི། སྔོན་འབྱུང་སྲིད་པའི་ཤ་ཚུགས་ཅན། །ལས་ཀྱི་རྫུ་འཕྲུལ་ཤུགས་དང་ལྡན། །ཞེས་པ་ཆེ་ཆུང་ནི་བྱིས་པ་ལོ་ལྔ་པའི་ཚད་ཅན་ཏེ་ཟས་སུ་དྲི་ཟ་བ་ལུས་ལ་གར་ཡང་ཐོག་རྡུགས་མེད་པ་འབྱུང་བའི་གནོད་པས་མི་ཚུགས་པ་དེ་ལྟ་བུ་ཡང་། དོན་གྱི་རྡོ་རྗེ་གདན་ཞེས་པ་བཏགས་པའི་དབང་དུ་བྱས་ན་སངས་རྒྱས་ཐམས་ཅད་ཀྱི་བྱིན་གྱིས་བརླབས་ལས་གྲུབ་པའི་སྣ་ཚོགས་རྡོ་རྗེ་བཞིན་གནས་པ་དེ་རྫས་ཀྱི་དངོས་པོར་མ་གྲུབ་པ་ཡེ་ཤེས་ཀྱི་སྣང་བ་ལས་བྱུང་བས་ན་དེ་ལ་རྡུག་ཅིང་། མའི་མངལ་ནི་ད་རུང་སྐྱེ་བ་བླང་མི་རན་པས་དེ་གཉིས་ལ་བརྡུག་(རྡུགས་)ལ། གཞན་ཡང་གང་ལ་ཐོག་པ་མེད་པར་འགྲོ་བ་དབང་པོ་རྣོན་པོའི་སེམས་དང་ལྡན་པ་སྟེ། དེ་དག་ལས་ཀྱི་སྟོབས་ལས་འབྱུང་བ་ཡིན་ནོ། །བར་དོ་དེ་ཡི་མིག་སྔ་རུ། །ཐབས་དང་ཤེས་རབ་མཐོང་བ་ལ། །ཞེས་བར་དོའི་སེམས་ཅན་དེའི་མིག་གིས་མཐོང་བ་ལ་འགྲོ་བ་རིགས་དྲུག་གི་སེམས་ཅན་ཕོ་མོ་སྦྱོར་བ་བྱེད་པ་ཐམས་ཅད་མཐོང་བར་འགྱུར་ཏེ་དེ་དག་བསྒོམ་ལུགས་ཀྱང་། བླ་མ་དག་ཏུ་དམིགས་བྱ་སྟེ། །གསང་བའི་དབང་ནི་དྲན་བྱས་ནས། །ཞེས་པ་དང་པོར་སྐྱེ་ཤིའི་བར་དོ་དང་བླ་མ་
2-1-28b
ཡབ་ཡུམ་ལ་གསང་བའི་དབང་ཞུ་བའི་དུས་བཞིན་དུ། མིག་སེར་དང་ཞེ་སྡང་གང་ཡང་མི་བྱ་བར་དབང་གཉིས་པ་དྲན་པར་བྱས། མིག་སེར་ཞེ་སྡང་ཀུན་སྤངས་ནས། །བདེ་བའི་མི་རྟོག་པ་བསྒོམས་པས། །ཤེས་པ་སྔོན་དུ་ཡང་ཆགས་སྡང་འདི་ལྟ་བུ་བྱས་པས་འཁོར་བར་སྐྱེས་པ་ཡིན་ལ་ད་ནི་དེ་ལྟར་མི་བྱ་དགོས་སྙམ་ནས། ཆགས་སྡང་ལྡོག་པར་བྱ་སྟེ། དང་པོ་བླ་མ་ཡབ་ཡུམ་དུ་བསམས་ལ་དབང་དང་གདམས་ངག་ཞུ་བར་བྱ། དེས་ཞག་བདུན་བར་དུ་བསྒོམས་པས་བཟློགས། དེ་ནས་ཡང་མ་བཟློག་ན་ཡི་དམ་ཡབ་ཡུམ་དུ་བསམས་ལ་མོས་གུས་བྱས་པས་བཟློགས། དེས་ཀྱང་མ་བཟློག་ན། ལམ་རིམ་གྱིས་སས་ཆགས་སྡང་གི་རྟོག་པ་བདེ་སྟོང་དུ་བསྒོམ་པར་བྱའོ། །ཡང་ན་སྔར་དུས་གང་བསྒོམས་པའི། །གོམས་པ་ཁྲིད་དང་བསྒོམ་པར་བྱ། །ཞེས་པ་ནི་ལམ་ཅིག་ཅར་བས་ཕྱག་རྒྱ་ཆེན་པོ་བསྒོམ་པར་བྱའོ། །ལམ་ཐུན་མོང་བས་བསྲེ་བ་གསུམ་གྱི་གདམས་པ་སྔོན་དུ་བསྒོམས་པས་འདོད་ཆགས་དང་ཟག་མེད་དུ་བསྲེ་བ་དང་། ཞེ་སྡང་དང་སྒྱུ་ལུས་སུ་བསྲེ་བ་དང་། གཏི་མུག་དང་འོད་གསལ་དུ་བསྲེ་བའི། སྦྱངས་པ་སྔོན་དུ་དྲན་པར་བྱ། །དུས་སུ་དྲན་པར་གྱུར་ནས་ནི། །དང་པོའི་སྲིད་པ་ཁེགས་པར་འགྱུར། །ཞེས་པ་སྐྱེ་བ་འདི་ལ་ཉིན་མོ་འོད་
2-1-29a
གསལ་ལ་སྦྱངས་པ་དེས་ནུབ་མོ་གཉིད་ཀྱི་དུས་སུ་རྨི་ལམ་དུ་འགྲོ་བ་ལ། རྨི་ལམ་འོད་གསལ་དུ་འཕོ་ནུས་པ་དེས། འཆི་ཁར་བསམ་གཏན་གྱི་འོད་གསལ་དང་། རང་བཞིན་གྱི་འོད་གསལ་གཅིག་ཏུ་བསྲེས་པས་རྩལ་སྦྱངས་པ་དེ་བར་དོ་གཉིས་པར་དྲན་པ་མངོན་དུ་བྱས་པས་སྐྱེ་བ་རྣམ་པ་བཞིའི་སྒོ་བཅད་དེ། དང་པོ་ཆགས་སྡང་བཟློག་པས་མངལ་གྱི་སྐྱེ་སྒོ་ཁེགས། ལས་རྒྱུ་འབྲས་ཤེས་པས་དྲོད་གཤེར་སྐྱེ་སྒོ་ཁེགས། སྣང་སྟོང་འཇའ་ཚོན་ཙམ་དུ་ཤེས་པས་བརྫུས་ཏེ་སྐྱེས་པ་ཁེགས། དྲན་པ་དང་འདུན་པའི་ཡེ་ཤེས་ཀྱིས་མཚམས་སྦྱར་བས། སྒོ་ང་ལས་སྐྱེ་བ་ཁེགས་སོ། །དེ་ལྟར་བདུན་ཕྲག་དང་པོ་ཁེགས་ནས། དེ་ནས་བདུན་ཕྲག་དྲུག་པོ་རྣམས་ཚེགས་མེད་པར་ཁེགས་སོ། །དེ་ནས་བདུན་ཕྲག་དྲུག་གི་བར། །གོང་མ་བཞིན་དུ་གོམས་བྱས་ནས། །བཞི་བཅུ་རྩ་དགུ་འདས་པ་དང་། །ཞེས་པ་བར་མ་དོའི་སྲིད་པ་དེ་ཡིད་ཀྱི་ལུས་དེ་ལ་བརྟེན་ནས་དྲན་པས་དབང་བསྒྱུར་བར་བྱ་སྟེ། མཉམ་བཞག་དང་རྗེས་ཐོབ་མེད་པར་ཉམས་སུ་བླངས་པས། འཁོར་བའི་སྲིད་པ་ཁེགས་པ་ཡིན། །ཞེས་གསུངས་པས། དེ་ལྟར་སྒྱུ་མར་གནས་པ་ལ། །འོད་གསལ་བ་ཡིས་སྦྱང་བྱ་སྟེ། །ཤེས་པ་གོང་གི་སྒྱུ་ལུས་དེ་འོད་གསལ་གྱི་མེས་སྦྱངས་ནས་ཡེ་ཤེས་ཀྱི་
2-1-29b
སྐུར་གནས་པ་དེའི་ངང་ལས་ཟུང་འཇུག་མངོན་དུ་བྱས་པར་འགྱུར་ཏེ། ཟུང་འཇུག་གི་ངང་ལས། འོད་གསལ་བར་ནི་འཇུག་པར་འགྱུར། །ཞེས་པ་འོད་གསལ་བདེ་བ་ཆེན་པོའི་ངང་ལས་འགྲོ་བ་གཞན་དོན་དུ་དམིགས་པ་མེད་པའི་ཐུགས་རྗེ་ཆེན་པོས་འགྲོ་བ་སེམས་ཅན་གྱི་དོན་འབད་རྩོལ་མེད་པར་འགྱུར་བའོ། །དེས་ནི་ལམ་རིམ་གྱིས་པ་དང་ཅིག་ཅར་བ་གཉིས་ལ་བརྟེན་ནས་གང་ཟག་ཅིག་སེམས་ཅན་ནས་སངས་རྒྱས་ཀྱི་སར་འགྲོ་བར་བྱེད་པའི་ལམ་ཚང་ལ་མ་ནོར་བ་ཞིག་བསྟན་པའོ། །གཙིགས་ཀྱི་རྒྱ་བདུན་དང་བཅས་པ་ནི། ཨུ་རྒྱན་དུ་ཌཱ་ཀི་མ་ལ་གཏོད་པའི་དུས་སུ་དང་པོ་སངས་རྒྱས་ཀྱི་བཀའ་རྒྱར་བཏབ་པ་དང་གཅིག །དེ་ནས་སྡུད་པ་པོས་རྒྱས་བཏབ་པ་དང་གཉིས། དེ་ནས་ཌཱ་ཀི་མས་སྐུ་གསུང་ཐུགས་གསུམ་གྱིས་རྒྱས་བཏབ་པ་དང་ལྔ། དེ་ནས་བླ་མ་རྣམས་ཀྱིས་རྒྱས་བཏབ་པ་དང་དྲུག །དེ་ནས་ཆོས་སྐྱོང་རྣམས་ཀྱིས་རྒྱས་བཏབ་པ་དང་བདུན་ནོ། །འདི་ལ་བཀའ་སྲུང་མགོན་པོ་གུར་མགོན་དང་། དཔལ་ལྷ་མོ་དུད་སོལ་ནག་མོ་གཉིས་ལ་གཉེར་དུ་གཏད་པ་ཡིན་པས་སྐལ་ལྡན་རེ་རེ་ལས་གཞན་དུ་མ་སྤེལ་ཅིག །གསང་བ་བདུད་རྩིའི་ཆུ་རྒྱུན་ཞེས་བྱ་བ་དྲི་མ་མེད་པའི་གདམས་པ། མར་པ་ཆོས་ཀྱི་བློ་གྲོས་ཀྱིས་སྲས་དར་མ་མདོ་སྡེའི་དོན་དུ་ཡི་གེར་བཀོད་པ་རྗེ་ནཱ་
2-1-30a
རོ་པ་ཉིད་ཀྱི་གསུང་གི་དོན་ལྷོ་བྲག་ཆུས་ཁྱེར་གྱི་སྲས་སྟེངས་སུ་སྦྱར་བའོ། །མ་འོངས་པའི་དུས་སུ་སྐལ་ལྡན་འདི་དོན་རྟོགས་པ་རྣམས་དང་འཕྲད་པར་ཤོག། །།སྦྱངས་པ་ནི་སྟོད་སྨད་ཀྱི་དཀྱིལ་ཀྲུང་བཅས་ལ་ནམ་མཁའ་གྲུ་གསུམ་ཙམ་དུ་རླུང་བཟུང་ཞིང་པུས་མོ་བསྐོར་ཞིང་སེ་གོལ་གཏོགས་བརྒྱ་རྩ་བརྒྱད་ཐུབ་བོ། །སྤྱི་བོའི་ཐོད་པ་དཀར་ཧང་ངེ་བའི་ཧཱུྃ་དཀར་པོ་ལ་སེམས་གཏད་ས་དྲག་ཏུ་བྱ་ལ་འཕོའོ།། །།

